მიუხედავად იმისა, რომ გასულ თვეში ხელოვნურ ინტელექტზე ორიენტირებულმა ჰეჯ-ფონდმა Situational Awareness-მა თავისი საჯარო პორტფელის უდიდესი ნაწილის გაყიდვა გადაწყვიტა, ფონდი კვლავ აგრძელებს მასშტაბურ ინვესტიციებს.
The Wall Street Journal-ის ინფორმაციით, ფონდმა 400 მილიონი დოლარი ჩადო სტარტაპ Source Foundry-ში. კომპანია სტენფორდის უნივერსიტეტის მკვლევრების მიერ არის დაარსებული და მისი მიზანი ჩიპების წარმოების პროცესის დაჩქარება და გაიაფებაა. ამ ტრანზაქციით, Situational Awareness-ის მიერ Source Foundry-ში განხორციელებული ჯამური ინვესტიცია 500 მილიონ დოლარს აღწევს.
Situational Awareness-ის დამფუძნებელი OpenAI-ის ყოფილი მკვლევარი, ლეოპოლდ აშენბრენერია. მან ფონდი 2024 წელს, სავაჭრო გამოცდილების გარეშე დააარსა. თავდაპირველად ფონდმა მაღალი მოგება აჩვენა, თუმცა ბოლო თვეებში AI ინფრასტრუქტურის აქციების ვარდნის ფონზე, ფონდმა მნიშვნელოვანი ზარალი განიცადა.
ივლისის ბოლოს Situational Awareness-მა თავისი საჯარო პორტფელის უმეტესი ნაწილი კენ გრიფინის Citadel-ს მიჰყიდა, თუმცა Anthropic-ის აქციები შეინარჩუნა. გავრცელებული ინფორმაციით, ფონდის მართვის ქვეშ არსებული აქტივები 20 მილიარდიდან 10 მილიარდ დოლარამდე შემცირდა.
წყარო: techcrunch.com
