ბრიტანულმა neocloud-მა Nscale-მა, მიმდინარე წლის ბოლოს დაგეგმილი IPO-ს წინ, 3.36 მილიარდი დოლარის დაფინანსება მოიზიდა. კონვერტირებადი ობლიგაციების სახით მოზიდული ეს მასშტაბური კაპიტალი ხაზს უსვამს იმ უზარმაზარ ფინანსურ რესურსებს, რაც AI მონაცემთა ცენტრების მშენებლობისთვის არის საჭირო.
ინვესტიციას სათავეში ჩაუდგა ჰეჯ-ფონდი Third Point. გარიგება მოიცავს 2.36 მილიარდ დოლარს, რომელიც კომპანიისთვის დაუყოვნებლივ არის ხელმისაწვდომი, ხოლო დამატებით 1 მილიარდ დოლარს Nscale ნოემბრის შუა რიცხვებში მიიღებს არსებული ინვესტორისგან, Nvidia-სგან. IPO-ს დასრულების შემდეგ, აღნიშნული ობლიგაციები კაპიტალის წილებად გარდაიქმნება.
Financial Times-ის ცნობით, Nscale-ი, რომელმაც IPO-სთვის საჭირო დოკუმენტაცია გასულ კვირას წარადგინა, ნიუ-იორკის საფონდო ბირჟაზე (NYSE) 35 მილიარდ დოლარად შეფასდება. Bloomberg-ის ინფორმაციით, კომპანია საჯარო შეთავაზების გზით 3 მილიარდი დოლარის მოზიდვას გეგმავს.
Nscale, რომელიც ორი წლის წინ ავსტრალიური კრიპტოვალუტის მაინინგ კომპანია Arkon Energy-დან გამოეყო, IPO-ს განაცხადის თანახმად, უკვე ფლობს 103 მილიარდ დოლარზე მეტი ღირებულების კონტრაქტებს. ამჟამად კომპანია რამდენიმე მსხვილი მონაცემთა ცენტრის მშენებლობას ახორციელებს, მათ შორის ნორვეგიასა და დასავლეთ ვირჯინიაში.
წყარო: techcrunch.com
