ფიტნესისა და ჯანმრთელობის ტრეკინგის მწარმოებელმა კომპანია Whoop-მა $575 მილიონიანი Series G დაფინანსების რაუნდი დახურა, რითაც მისი შეფასება $10.1 მილიარდს გაუტოლდა. ეს მაჩვენებელი თითქმის სამჯერ აღემატება წინა შეფასებას ($3.6 მილიარდი). გარიგებაში მონაწილეობენ სუვერენული ფონდები, მსხვილი სამედიცინო ინსტიტუტები და მსოფლიოში ცნობილი სპორტსმენები.
რაუნდს ლიდერობდა Collaborative Fund. ინვესტორებს შორის არიან Mubadala Investment Company, Qatar Investment Authority, Abbott, Mayo Clinic, IVP და სხვები. ინდივიდუალურ ინვესტორებს შორის ვხვდებით კრიშტიანუ რონალდუს, ლებრონ ჯეიმსსა და სხვა ცნობილ სახეებს. კომპანიას დაარსებიდან დღემდე დაახლოებით $900 მილიონი აქვს მოზიდული.
ინვესტორთა სიაში სამედიცინო მოწყობილობების გიგანტის, Abbott-ის გამოჩენა განსაკუთრებით საყურადღებოა. Whoop-ის დამფუძნებლისა და CEO-ს, უილ აჰმედის თქმით, ეს პარტნიორობა ჯანდაცვისა და სამედიცინო მიმართულებით კომპანიის გაფართოებაზე მიუთითებს.
აჰმედის განცხადებით, დაფინანსება ემთხვევა Whoop-ის მნიშვნელოვან ბიზნეს-მიღწევებს. გასულ წელს კომპანიის წლიურმა ჯავშნების მაჩვენებელმა $1.1 მილიარდს მიაღწია (103%-იანი ზრდა). აჰმედი ხაზს უსვამს, რომ აპარატული უზრუნველყოფის მიწოდებისა და სააბონენტო ბიზნესის სინქრონული მართვისას, კომპლექსური სურათის დასანახად ინვესტორებისთვის სწორედ ჯავშნების მეტრიკაა ყველაზე რელევანტური.
მოზიდული კაპიტალი მოხმარდება ტალანტების დაქირავებას, მარკეტინგს, R&D ინვესტიციებსა და საერთაშორისო ექსპანსიას. რაც შეეხება პოტენციურ IPO-ს, აჰმედის თქმით, კომპანია აქტიურად ემზადება საჯარო კომპანიის სტატუსისთვის, თუმცა ბირჟაზე გასვლის კონკრეტული თარიღი ჯერ არ გამოცხადებულა.
წყარო: techcrunch.com
