აშშ-ში ავიამიმოსვლის შეფერხება რუტინულმა ტექნიკურმა სამუშაოებმა გამოიწვია

აშშ-ის ტრანსპორტის მდივანმა შონ დაფიმ განაცხადა, რომ ქვეყნის მასშტაბით ავიამიმოსვლის შეჩერება რუტინული ტექნიკური სამუშაოების შედეგი იყო. პრობლემა წარმოიქმნა მას შემდეგ, რაც ფედერალური საავიაციო ადმინისტრაციის (FAA) კონტრაქტორმა კომპანია L3Harris-მა დისტანციურ ლოკაციაზე სპილენძის კაბელი ოპტიკურ-ბოჭკოვანი კაბელით შეცვალა. განახლების პროცესში როუტერმა გადატვირთა კრიტიკული საკომუნიკაციო სისტემა, რამაც ფრენების მასშტაბური შეფერხება გამოიწვია.

FAA-ის ტექნიკურმა დირექტორმა რებეკა გაიმ განმარტა, რომ ქსელის არასტაბილურობის დაფიქსირებისთანავე მათ აღმოაჩინეს ორი წერტილი, რომლებიც ქსელს წამებში ათასობით მოთხოვნით ტვირთავდა. სისტემის სტაბილიზაცია მათი გათიშვის შემდეგ მოხერხდა. ამჟამად მიმდინარეობს ინციდენტის მიზეზების დეტალური ანალიზი, რათა დადგინდეს, იყო თუ არა ეს ადამიანური შეცდომა ან დეფექტური აპარატურის ბრალი.

ავიაციის მონაცემთა ფირმა Cirium-ის ინფორმაციით, პარასკევს 8 200-ზე მეტი რეისი გაუქმდა, ხოლო შეფერხებების ეფექტი შაბათსაც გაგრძელდა, როდესაც დამატებით 3 000-მდე ფრენა ჩაიშალა. ეს 21-ე საუკუნეში აშშ-ის საავიაციო სივრცის სრული გაჩერების მხოლოდ მესამე შემთხვევაა.

მიუხედავად იმისა, რომ ინციდენტი დაემთხვა FAA-ს მიერ ახალი AI ინსტრუმენტის დანერგვას, ადმინისტრატორმა ბრაიან ბედფორდმა კატეგორიულად უარყო რაიმე კავშირი ხელოვნურ ინტელექტთან ან რაიმე სახის მავნე ქმედებასთან. შონ დაფიმ აღნიშნა, რომ სამომავლოდ მსგავსი სამუშაოების დაგეგმვის პროცესი გადაიხედება, თუმცა კვლავ ხაზი გაუსვა საავიაციო ინფრასტრუქტურის განახლებისთვის დამატებითი საბიუჯეტო დაფინანსების აუცილებლობას.

წყარო: techcrunch.com