ხელოვნური ინტელექტის სტარტაპმა EliseAI-მა 350 მილიონი დოლარის დაფინანსება მიიღო, რის შედეგადაც კომპანიის საბაზრო ღირებულება 4 მილიარდ დოლარამდე გაიზარდა. ეს მაჩვენებელი ორჯერ აღემატება გასული წლის აგვისტოში, Series E რაუნდის დროს დაფიქსირებულ შეფასებას.
ინვესტიციის რაუნდს სათავეში Andreessen Horowitz და Bessemer Ventures ჩაუდგნენ. 2017 წელს დაარსებული EliseAI სპეციალიზდება საცხოვრებელი უძრავი ქონებისა და ჯანდაცვის სექტორებისთვის ადმინისტრაციული და ოპერაციული პროცესების ავტომატიზაციაზე. კომპანიის მონაცემებით, მათი პროგრამული უზრუნველყოფა აშშ-ის ბინების ყოველ მეექვსე ერთეულში გამოიყენება, ხოლო წლიურმა განმეორებადმა შემოსავალმა (ARR) 200 მილიონ დოლარს გადააჭარბა.
ცოტა ხნის წინ კომპანიამ წარადგინა AI-ასისტენტი Apollo, რომელიც პლატფორმის შიგნით სხვადასხვა დავალების შესრულებაში ეხმარება გუნდებს. „Apollo ინტეგრირებულია იმავე პლატფორმაში, რომელიც უკვე მართავს იჯარის, ტექნიკური მომსახურებისა და ხელშეკრულებების განახლების პროცესებს, რაც მას საშუალებას აძლევს, ეფექტურად იმუშაოს უძრავი ქონების მართვის გუნდის ნებისმიერ რგოლში“, — განაცხადა თანადამფუძნებელმა და აღმასრულებელმა დირექტორმა მინა სონგმა.
ჯანდაცვის მიმართულებით, EliseAI ავტომატიზაციას უკეთებს პაციენტებთან დაკავშირებულ დოკუმენტაციას, მათ შორის ვიზიტების დაგეგმვას, სადაზღვევო ვერიფიკაციასა და სამედიცინო ბარათების მომზადებას. კომპანიის სტრატეგიული ფოკუსი სწორედ საცხოვრებელსა და ჯანდაცვაზეა, რადგან ეს სფეროები ამერიკული ოჯახების ხარჯების ყველაზე დიდ წილს შეადგენს.
წყარო: techcrunch.com
