კომპანია SpaceX-ის გარდა, ამ კვირაში საჯარო ბაზარზე გასვლის გეგმები კიდევ ერთმა ცნობილმა ტექნოლოგიურმა ბრენდმა გაამჟღავნა. ხუთშაბათს, ფინურმა ჭკვიანი ბეჭდების მწარმოებელმა Oura-მ აშშ-ის ფასიანი ქაღალდებისა და ბირჟების კომისიას (SEC) კონფიდენციალურად წარუდგინა S-1 ფორმის განაცხადი IPO-სთვის მოსამზადებლად.
2015 წელს დაარსებული Oura დღეს ერთ-ერთი ყველაზე პოპულარული ჯანმრთელობის Wearable ტრეკერია. მან ბაზარზე თავი დაიმკვიდრა დახვეწილი, თითქმის შეუმჩნეველი დიზაინით, რითაც კონკურენციას უწევს Fitbit-ს, Garmin-სა და Apple Watch-ს.
Oura-ს ბეჭედი აკონტროლებს ფიზიკურ აქტივობას, ძილის ხარისხსა და ორგანიზმის ყოველდღიურ მზაობას. გასული წლის სექტემბერში, Series E დაფინანსების რაუნდის დროს, კომპანიამ განაცხადა, რომ უკვე გაყიდული ჰქონდა 5.5 მილიონი ბეჭედი, რაც მნიშვნელოვანი ზრდაა წინა წლის 2.5 მილიონიან მაჩვენებელთან შედარებით.
Series E რაუნდში Oura-მ 875 მილიონი აშშ დოლარის მოზიდვა შეძლო, რის შედეგადაც კომპანიის ღირებულება 11 მილიარდ დოლარად შეფასდა. ეს ორჯერ აღემატება 2024 წლის წინა რაუნდში დაფიქსირებულ 5 მილიარდ დოლარიან შეფასებას.
მზარდი მომხმარებლების მოთხოვნების დასაკმაყოფილებლად, კომპანიამ ახლახან სპეციალური AI მოდელიც წარადგინა, რომელიც ქალთა ჯანმრთელობის მონიტორინგზეა ორიენტირებული.
წყარო: techcrunch.com
