Founders Fund ცნობილია ისეთი "zero to one" კომპანიების დაფინანსებით, რომლებიც მხოლოდ არსებულს კი არ აუმჯობესებენ, არამედ სრულიად ახალს ქმნიან. მისი პორტფელი მოიცავს Facebook-ს, SpaceX-სა და Palantir-ს. ახლა კი ფონდის ყურადღების ცენტრში ახალი ზელანდიური startup-ი მოექცა, რომელიც ძროხებისთვის მზის ენერგიაზე მომუშავე ჭკვიან საყელოებს აწარმოებს.
Halter-მა გასულ თვეში $220-მილიონიანი Series E რაუნდი დახურა, რომელსაც Founders Fund ლიდერობდა და კომპანია $2 მილიარდად შეფასდა. მიუხედავად იმისა, რომ სტარტაპი AI-ს ან ჰუმანოიდურ რობოტებს არ იყენებს, ის ძალიან დიდ პრობლემას ჭრის: როგორ უნდა ვმართოთ შორეულ ტერიტორიებზე გაფანტული პირუტყვი ტრადიციული მეთოდების, მაგალითად, ძაღლების, ცხენების ან შვეულმფრენების გარეშე?
Halter-ის 30 წლის დამფუძნებლისა და CEO-ს, კრეიგ პიგოტის განცხადებით, ფერმის მართვისას ყველაზე მნიშვნელოვანი ცვლადი მიწის პროდუქტიულობაა. "ვირტუალური ღობეები პირუტყვის საძოვრებზე მართვისა და მიწის დასვენების იდეალური ინსტრუმენტია," — აღნიშნავს ის.
სისტემა აერთიანებს მზის ენერგიაზე მომუშავე საყელოს, დაბალსიხშირიან ანძებსა და სმარტფონის აპლიკაციას. ფერმერებს შეუძლიათ ვირტუალური ღობეების შექმნა, ნახირის 24/7-ზე მონიტორინგი და მართვა სახლიდან გაუსვლელად. საყელო გამოსცემს აუდიო და ვიბრაციულ სიგნალებს, რომლებზეც ძროხები სწრაფად რეაგირებენ. მოწყობილობა ასევე აგროვებს მონაცემებს ცხოველის ჯანმრთელობის, ავადობისა და რეპროდუქციული ციკლების შესახებ.
გლობალური ექსპანსია და მომავლის ხედვა
Halter-ის ტექნოლოგიას უკვე 2000-ზე მეტ ფერმაში, 1 მილიონზე მეტ პირუტყვზე იყენებენ ახალ ზელანდიაში, ავსტრალიასა და აშშ-ში. ინვესტიციაზე უკუგება (ROI) ფერმერებისთვის შთამბეჭდავია — ზუსტი კონტროლის ხარჯზე, მათ შეუძლიათ მიწის პროდუქტიულობის 20%-მდე გაზრდა.
კონკურენციის მიუხედავად (მათ შორის ფარმაცევტული გიგანტის, Merck-ისა და დრონების startup-ების მხრიდან), პიგოტი მიიჩნევს, რომ მთავარი გამოწვევა არა ტექნოლოგია, არამედ სტატუს-კვოს შენარჩუნებაა. მისი თქმით, Halter-ის უპირატესობა სწორედ მაღალ სანდოობასა და საინჟინრო სირთულეების დაძლევაში მდგომარეობს.
კომპანიას საერთო ჯამში უკვე $400 მილიონი აქვს მოზიდული. მიუხედავად ამისა, მსოფლიოში 1 მილიარდზე მეტი პირუტყვია. პიგოტის თქმით, Halter-ს გლობალურ ბაზარზე მასშტაბირების უზარმაზარი პოტენციალი აქვს და ჯერ კიდევ ბევრი საქმეა გასაკეთებელი.
წყარო: techcrunch.com
