
Google-ის Chrome-ის გუნდი Gemini მოდელებზე დაფუძნებული AI ბრაუზინგის ფუნქციების განვითარებაზე მუშაობს. იმისათვის, რომ სისტემამ შეუფერხებლად იმუშაოს და თავიდან აიცილონ გაუთვალისწინებელი შეცდომები, კომპანიამ შექმნა იზოლირებული, ალტერნატიული ინტერნეტ სივრცე, რომელსაც სრულად აკონტროლებს.
ვებ-აგენტებს სჭირდებათ რეალურ ინტერნეტთან ადაპტაცია, თუმცა შეზღუდულ გარემოში ტესტირება ხშირად არასაკმარისია. მეორე მხრივ, დაუხვეწავი აგენტების ღია ინტერნეტში გაშვება სარისკოა. სწორედ ამიტომ, Google-მა შეიმუშავა „სარკისებური განზომილება“ (Mirror Dimension) – მრავალფეროვანი და იზოლირებული ვებ-ეკოსისტემა, რომელიც მოიცავს სოციალურ ქსელებს, ონლაინ მაღაზიებსა და საბანკო პლატფორმებს. ეს გარემო აგენტებს საშუალებას აძლევს, შეასრულონ დავალებები რეალურ პირობებთან მიახლოებულ გარემოში და გაიარონ უსაფრთხოების ტესტები, მათ შორის prompt-injection შეტევების წინააღმდეგ.
Chrome-ის AI უსაფრთხოების გუნდის ინჟინრის, ჩარლზ ციანის თქმით, ვებ-სივრცე საკმაოდ რთული და მტრულად განწყობილია, ამიტომ აგენტების ქცევის სრულყოფილად შესწავლა აუცილებელია. სისტემა უკვე ავითარებს განსჯის უნარს, რათა გაარჩიოს, როდის არის საჭირო დამოუკიდებელი მოქმედება და როდის – მომხმარებლის დადასტურება.
ამ ვირტუალური სამყაროს შესაქმნელად Google-მა გამოიყენა სხვა AI აგენტები, რომლებმაც სწრაფად დააგენერირეს რეალისტური ვებ-სერვისები და მონაცემთა ნაკადები. მიუხედავად იმისა, რომ მკვლევარებს მოუწიათ ბრაუზერის გარკვეული პარამეტრების მოდიფიცირება, რათა აგენტებს სრულფასოვანი წვდომა ჰქონოდათ, კომპანია ხაზს უსვამს, რომ ეს მეთოდები მხოლოდ კონტროლირებად გარემოს ეხება და არანაირ საფრთხეს არ უქმნის Chrome-ის ჩვეულებრივ მომხმარებლებს.
Google-ის საინჟინრო დირექტორი დაგ ტერნერი აცხადებს, რომ ეს მიდგომა სხვა გუნდებისთვისაც მისაბაძი მაგალითი უნდა გახდეს. კომპანია გეგმავს ინვესტიციების გაგრძელებას ამ გარემოს გასაუმჯობესებლად, რათა მოდელების ტრენინგი კიდევ უფრო რეალისტური და უსაფრთხო გახდეს.
წყარო: wired.com






