ბირთვული ენერგეტიკის სტარტაპმა Bluecore Energy-მ დაარსებიდან სულ რაღაც ორ თვეში 50 მილიონი დოლარის ოდენობის სათესლე (seed) რაუნდი დახურა. კომპანიამ, რომელმაც მანამდე 10 მილიონი დოლარის პრე-სიდ ინვესტიცია მიიღო, ინვესტორების დიდი ინტერესი გამოიწვია.
კომპანიის დამფუძნებლის, კოფი ასანტეს იდეა მცირე ზომის ბირთვული რეაქტორების (SMR) მცურავ ბარჟებზე განთავსებას გულისხმობს. ეს ტექნოლოგია პორტებსა და მიმდებარე ინფრასტრუქტურას სუფთა ენერგიით უზრუნველყოფს. ასანტეს თქმით, მცურავი რეაქტორების კონცეფცია ათწლეულებია წარმატებით გამოიყენება სამხედრო-საზღვაო ფლოტში, Bluecore Energy-მ კი ეს ტექნოლოგია უფრო კომპაქტური და მობილური გახადა.
ინვესტიციების რაუნდს Silverton Partners ხელმძღვანელობდა. პროექტს მხარს უჭერენ ისეთი ცნობილი ინვესტორები, როგორებიც არიან Ripple-ის თანადამფუძნებელი კრის ლარსენი და HartBeat Ventures. კომპანიის გუნდი დაკომპლექტებულია SpaceX-ის, Rivian-ისა და Toyota-ს ყოფილი თანამშრომლებით, რაც მათ კრიტიკული კომპონენტების მიწოდების ჯაჭვის მართვაში ეხმარება.
ამჟამად Bluecore Energy აშშ-ის ბირთვული რეგულირების კომისიასთან (NRC) და სანაპირო დაცვასთან ერთად პროდუქტის დიზაინის სერტიფიცირების პროცესს გადის. მოზიდული კაპიტალი მოხმარდება პროდუქტის შემდგომ განვითარებას, მარეგულირებელ პროცედურებს, ბირთვული საწვავის შეძენასა და გუნდის გაფართოებას. სტარტაპი უკვე იღებს შეკვეთებს პორტებისა და AI მონაცემთა ცენტრებისგან, რომლებსაც სუფთა ენერგიის სტაბილური წყარო ესაჭიროებათ.
წყარო: techcrunch.com
