აშშ-ის უზენაესმა სასამართლომ მნიშვნელოვანი გადაწყვეტილება მიიღო, რომელიც სამართალდამცავი ორგანოების მიერ ე.წ. geofence-ორდერების გამოყენებას ზღუდავს. სასამართლოს განმარტებით, ინდივიდს აქვს გონივრული მოლოდინი საკუთარი მობილური ტელეფონის ლოკაციის მონაცემების კონფიდენციალურობასთან დაკავშირებით.
6-3 ხმით მიღებული გადაწყვეტილების თანახმად, სამართალდამცავებმა ტექნოლოგიური კომპანიებისგან, როგორიცაა Google, მომხმარებელთა ლოკაციის ისტორიის მისაღებად სასამართლოს შესაბამისი ორდერი უნდა წარადგინონ. სასამართლომ უარყო ე.წ. „მესამე მხარის დოქტრინის“ გამოყენება ამ კონტექსტში, რადგან მომხმარებლები სერვისებით სარგებლობისას ავტომატურად არ თანხმდებიან საკუთარი გადაადგილების ისტორიის საჯაროობას.
Geofence-ორდერები სამართალდამცავებს საშუალებას აძლევდა, კომპანიებისგან მოეთხოვათ ინფორმაცია კონკრეტულ დროსა და ადგილას მყოფი ყველა მომხმარებლის შესახებ. კრიტიკოსები ამ პრაქტიკას არაკონსტიტუციურად მიიჩნევდნენ, რადგან ის ხშირად უდანაშაულო პირების მონაცემებსაც მოიცავდა. სასამართლომ დაადგინა, რომ მეოთხე შესწორება, რომელიც დაუსაბუთებელი ჩხრეკისა და ამოღებისგან იცავს, ვრცელდება ციფრულ ლოკაციურ მონაცემებზეც.
მიუხედავად იმისა, რომ გადაწყვეტილება სრულად არ კრძალავს geofence-ორდერებს, ის ავალდებულებს გამომძიებლებს, დაამტკიცონ „სავარაუდო მიზეზი“ (probable cause) კონკრეტული დანაშაულის ჩადენასთან დაკავშირებით. ეს გადაწყვეტილება მნიშვნელოვანი პრეცედენტია ტექნოლოგიური კომპანიებისთვის, როგორიცაა Microsoft, Uber და Yahoo, რომლებიც რეგულარულად იღებენ მსგავს მოთხოვნებს.
წყარო: techcrunch.com
