აშშ-ის ფედერალურმა კომუნიკაციების კომისიამ (FCC) რვა კომპანია დააჯარიმა, რომლებიც, სავარაუდოდ, DJI-ის მიერ შექმნილი „ფრონტ კომპანიებია“. აღნიშნული სტრატეგიით ჩინური ტექნოლოგიური გიგანტი აშშ-ის ბაზარზე დაწესებულ შეზღუდვებსა და დრონების აკრძალვას გვერდს უვლის. თითოეულ კომპანიას 25 000 აშშ დოლარის ოდენობის ჯარიმა დაეკისრა, რადგან მათ FCC-ის ოფიციალურ მოთხოვნებზე პასუხი არ გასცეს.
სიაში მოხვდნენ ისეთი კომპანიები, როგორებიცაა: Cogito Tech, Fixaxo Technology, Lyno Dynamics, Skyhigh Tech, Spatial Hover, SZ Knowact, WaveGo Tech და Xtra Technology. FCC-ის განცხადებით, ეს ორგანიზაციები ვალდებულნი არიან, 20 ივლისამდე უპასუხონ კომისიის კითხვებს, წინააღმდეგ შემთხვევაში, მათ მიმართ უფრო მკაცრი ზომები გატარდება.
კონფლიქტის მთავარი მიზეზი ეროვნული უსაფრთხოების რისკებია. გასული წლის დეკემბერში FCC-მ უცხოური დრონების მწარმოებლები ე.წ. „დაფარულ სიაში“ (Covered List) შეიყვანა, რაც მათ რადიოსიხშირული მოწყობილობების ავტორიზაციას უკრძალავს. კომისიამ ასევე მიიღო უფლებამოსილება, რეტროაქტიულად აკრძალოს ისეთი პროდუქტების იმპორტი და რეალიზაცია, რომლებიც DJI-ის კომპონენტებს შეიცავენ.
გამოძიების ფარგლებში, FCC ყურადღებას ამახვილებს იმ ტესტირების ლაბორატორიებზეც, რომლებიც ამ პროდუქტების სერტიფიცირებას ახდენდნენ. კერძოდ, კომისიამ განაცხადა SGS-ის აკრედიტაციის გაუქმების განზრახვის შესახებ, რადგან ლაბორატორიის მფლობელობაში ჩინური სახელმწიფო სტრუქტურების წილი ფიქსირდება. DJI-მ აღნიშნულ ქმედებებთან დაკავშირებით კომენტარის გაკეთებაზე უარი განაცხადა.
წყარო: theverge.com
