Samsung-ის განცხადებით, RAM ჩიპების მიმდინარე დეფიციტი არა მხოლოდ მომავალ წელს შენარჩუნდება, არამედ 2027 წელს კიდევ უფრო გამწვავდება და სავარაუდოდ, 2028 წლამდე გასტანს. კომპანია, რომელიც მსოფლიოს მეხსიერების ჩიპების დაახლოებით მესამედს აწარმოებს, ამ ტენდენციას ხელოვნური ინტელექტის (AI) სფეროში არსებულ უპრეცედენტო მოთხოვნას უკავშირებს.
მეორე კვარტლის ფინანსური ანგარიშის მიხედვით, წამყვანი AI ლაბორატორიები Samsung-თან პირდაპირ თანამშრომლობენ, რათა გრძელვადიანი კონტრაქტებით უზრუნველყონ საჭირო ინფრასტრუქტურა. ეს სტრატეგია Samsung-ს საშუალებას აძლევს, თავიდან აიცილოს ნახევარგამტარების ინდუსტრიისთვის დამახასიათებელი არასტაბილური ციკლები და წარმოების მასშტაბები მოთხოვნის შესაბამისად გაზარდოს.
თუმცა, ეს პროცესი ორლესლი მახვილია: მიუხედავად იმისა, რომ ნახევარგამტარების განყოფილებამ რეკორდულ მოგებას მიაღწია, ჩიპების გაძვირებამ უარყოფითად იმოქმედა სმარტფონებისა და ტელევიზორების სეგმენტზე. კომპონენტების თვითღირებულების ზრდამ Samsung აიძულა, გაეზარდა Galaxy-ს სერიის მოწყობილობების ფასები, რამაც, თავის მხრივ, მომხმარებელთა მოთხოვნის კლება გამოიწვია.
ე.წ. „RAMaggedon“-ის ეფექტი უკვე იგრძნობა მთელ ტექნოლოგიურ სექტორში. Apple-მა უკვე გაზარდა Mac-ებისა და iPad-ების ფასები, ხოლო Nvidia-ს მიერ გრაფიკული ბარათების მოსალოდნელმა გაძვირებამ შესაძლოა სათამაშო კონსოლებისა და პერსონალური კომპიუტერების ბაზარზეც იქონიოს გავლენა. მწარმოებლები რესურსებს AI მონაცემთა ცენტრებისკენ მიმართავენ, რაც მომხმარებლებისთვის ახალ რეალობას ქმნის: მაღალი ფასები ტექნიკურ მოწყობილობებზე.
წყარო: techcrunch.com
