ჭკვიანი ბეჭდების მწარმოებელი კომპანია Oura, რომელსაც ოფისები სან-ფრანცისკოსა და ფინეთში აქვს, Bloomberg-ის ინფორმაციით, აშშ-ში IPO-სთვის ემზადება. კომპანია 3 მილიარდ დოლარამდე კაპიტალის მოზიდვას გეგმავს, რაც 900-ზე მეტი თანამშრომლის მქონე ბიზნესს 16 მილიარდ დოლარზე მეტად შეაფასებს.
16 მილიარდიანი შეფასება მნიშვნელოვანი ზრდაა გასული წლის სექტემბერთან შედარებით, როდესაც კომპანიამ 875 მილიონი დოლარის Series E რაუნდი დახურა და 10.9 მილიარდი დოლარის ღირებულება მიიღო. ინვესტორთა შორის ისეთი გიგანტები არიან, როგორებიცაა Fidelity, ICONIQ და Temasek.
ტარებადი მოწყობილობების (wearables) ბაზარი სულ უფრო კონკურენტული ხდება. Samsung-მა უკვე გამოუშვა Galaxy Ring, ხოლო Oura-ს მთავარი კონკურენტი Whoop-ი აქტიურად ცდილობს აუდიტორიის გაფართოებას. Oura-მ, რომელიც თავდაპირველად ბიოჰაკერების ნიშურ ბრენდად პოზიციონირებდა, წარმატებით შეძლო მასობრივ ბაზარზე გადასვლა და ძილისა და აღდგენის მონიტორინგის წამყვან მოთამაშედ ჩამოყალიბება.
კომპანიის ფინანსური მაჩვენებლები შთამბეჭდავია: 2024 წელს შემოსავალმა 500 მილიონი დოლარი შეადგინა, 2025 წელს 1 მილიარდს მიაღწია, ხოლო 2026 წლისთვის პროგნოზი 2 მილიარდ დოლარს შეადგენს. მიუხედავად ამისა, კომპანია გარკვეულ გამოწვევებსაც აწყდება. სან-ფრანცისკოში Oura-ს წინააღმდეგ კოლექტიური სარჩელი შევიდა, რომელიც ძილის მონიტორინგის სიზუსტეს ეჭვქვეშ აყენებს. Oura-ს წარმომადგენლები ბრალდებებს უარყოფენ და აცხადებენ, რომ მათი ტექნოლოგია დამოუკიდებელი კვლევებითაა დადასტურებული.
წყარო: techcrunch.com
