Google ახალ ფუნქციას ნერგავს, რომელიც მომხმარებლებს დაეხმარება გაარკვიონ, არის თუ არა მათ მიერ ნანახი რეკლამა ხელოვნური ინტელექტის (AI) გამოყენებით შექმნილი. მიუხედავად იმისა, რომ AI ბიზნესებს რეკლამების შექმნასა და ხარჯების ოპტიმიზაციაში ეხმარება, ის ხშირად აბნევს მომხმარებელს, რადგან სინთეზური გამოსახულებები რეალურ ფოტოს ჰგავს.
ახალი ფუნქცია ხელმისაწვდომი იქნება My Ad Center-ის პანელში. მომხმარებლებს შეეძლებათ რეკლამაზე არსებულ სამწერტილიან მენიუს ან ინფორმაციის ხატულას დააჭირონ Google Search-ში, YouTube-სა და Google Discover-ში. ახალი ჩანართი „როგორ შეიქმნა ეს რეკლამა“ მიუთითებს, გამოყენებულია თუ არა მასში AI ტექნოლოგია.
Google-ის განცხადებით, თუ რეკლამა კომპანიის საკუთარი გენერაციული AI ხელსაწყოებითაა შექმნილი, დისკლეიმერი ავტომატურად გააქტიურდება. სხვა შემთხვევაში, პასუხისმგებლობა რეკლამის დამკვეთს ეკისრება — მათ თავად უნდა მიუთითონ AI-ის გამოყენების ფაქტი. Google არ აპირებს თითოეული რეკლამის შინაარსის დამოუკიდებლად გადამოწმებას, თუმცა ადგილობრივი კანონმდებლობის მოთხოვნის შემთხვევაში, მარკირება სავალდებულო ხდება.
წყარო: techcrunch.com
