Figma ცდილობს, გასცდეს მხოლოდ დიზაინის პლატფორმის ფუნქციას და თავის ეკოსისტემაში ხელოვნური ინტელექტის (AI) ინტეგრაციით, კოდირებისა და პროტოტიპირების შესაძლებლობები გააძლიეროს. ამ სტრატეგიის ფარგლებში, კომპანიამ შეიძინა სტარტაპ Bud-ის (ყოფილი Orchids) გუნდი, რომელიც ცნობილია თავისი vibe-coding და AI აგენტების პლატფორმით.
Bud-ის აღმასრულებელმა დირექტორმა, კევინ ლუმ, სოციალურ ქსელ X-ზე განაცხადა, რომ Figma არის ერთ-ერთი ყველაზე მნიშვნელოვანი პროდუქტზე ორიენტირებული კომპანია, რომელიც იდეების რეალობად ქცევის პროცესს ახალ ეტაპზე გადაიყვანს. Y Combinator-ის მიერ მხარდაჭერილი სტარტაპი თავდაპირველად მომხმარებლებს მობილური, ვებ და Slack აპლიკაციების სწრაფად შექმნის საშუალებას აძლევდა, მოგვიანებით კი გადაკვალიფიცირდა AI აგენტების პლატფორმად, რომელსაც სხვადასხვა სერვისთან წვდომა და ამოცანების ავტომატიზაცია შეუძლია.
გარიგების პირობების თანახმად, Bud და Orchids 18 ივლისამდე შეწყვეტენ ფუნქციონირებას, რის გამოც მომხმარებლებს პროექტების მიგრაცია მოუწევთ. მიუხედავად იმისა, რომ Figma-ს ოფიციალურად არ დაუკონკრეტებია გუნდის სამომავლო როლი, კომპანიის ბოლოდროინდელი ნაბიჯები — მათ შორის Figma Make-ის გაშვება და Claude Code-თან ინტეგრაცია — ცხადყოფს, რომ Figma მიზნად ისახავს დიზაინერებსა და დეველოპერებს მისცეს ინსტრუმენტები არა მხოლოდ სტატიკური კონცეფციების, არამედ სრულფასოვანი აპლიკაციების შესაქმნელად.
წყარო: techcrunch.com
