OpenAI-მ განაცხადა, რომ გასულ კვირას გაშვებული ChatGPT Images 2.0-ის ყველაზე დიდი მომხმარებელთა ბაზა ინდოეთში დაფიქსირდა. თუმცა, მესამე მხარის მონაცემები აჩვენებს, რომ გლობალური რეაგირება უფრო ზომიერია და ზრდა ძირითადად შერჩეულ განვითარებად ბაზრებზე შეიმჩნევა.
ChatGPT Images 2.0 შექმნილია უფრო რთული მოთხოვნების დასამუშავებლად და დეტალური ვიზუალების, მათ შორის სხვადასხვა ენაზე ზუსტი ტექსტის შესაქმნელად. კომპანიის მონაცემებით, მომხმარებლები — განსაკუთრებით ინდოეთში — მას ძირითადად პერსონალური ვიზუალების, ავატარებისა და სტილიზებული პორტრეტების გენერირებისთვის იყენებენ.
Sensor Tower-ისა და Similarweb-ის მონაცემებით, აპლიკაციის ჩამოტვირთვები გლობალურად 11%-ით გაიზარდა, თუმცა ყოველდღიური აქტიური მომხმარებლების რაოდენობა და გლობალური ვებ-ტრაფიკი მხოლოდ 1-1.6%-ით მოიმატა. მიუხედავად ამისა, განვითარებად ბაზრებზე, როგორებიცაა პაკისტანი, ვიეტნამი და ინდონეზია, ჩამოტვირთვების რაოდენობა 79%-მდე გაიზარდა.
ინდოეთი აქტივობის მთავარ წყაროდ რჩება. გაშვების კვირაში აქ ChatGPT დაახლოებით 5 მილიონჯერ ჩამოტვირთეს, შედარებისთვის — აშშ-ში ეს მაჩვენებელი 2 მილიონი იყო. ადრეული ტენდენციები აჩვენებს, რომ ინდოეთში AI ინსტრუმენტს მომხმარებლები თვითგამოხატვისთვის იყენებენ და ქმნიან სტუდიური სტილის პორტრეტებს, აღადგენენ ძველ ფოტოებს და აგენერირებენ ფანტასტიკური ჟანრის ვიზუალებს.
AI სურათების გენერირების ბაზარზე კონკურენცია იზრდება. OpenAI ახალი ვერსიით აუმჯობესებს არალათინური ტექსტის რენდერინგს და ამატებს ახალ “thinking” შესაძლებლობებს, რაც მომხმარებელს ერთ მოთხოვნაზე რამდენიმე ვარიაციის გენერირების საშუალებას აძლევს. ეს ნაბიჯი პასუხობს Google-ისა და სხვა კონკურენტების აქტივობას, რომლებიც ასევე დიდ ყურადღებას უთმობენ ინდოეთისა და განვითარებადი ქვეყნების ბაზრებს.
წყარო: techcrunch.com
