ილონ მასკი ოთხშაბათს მოწმის სტატუსით სასამართლოში დაბრუნდა, რათა OpenAI-სა და მისი CEO-ს, სემ ალტმანის წინააღმდეგ მიმდინარე დავაში თავისი პოზიცია დაეცვა. OpenAI-ს ადვოკატების ჯვარედინი დაკითხვისას, მასკს მოუწია პასუხის გაცემა 2017 წლის ძალაუფლებისთვის ბრძოლაზე, რომელიც მან საბოლოოდ წააგო. როგორც საქმეში წარმოდგენილი ელექტრონული წერილებიდან ირკვევა, ამ პერიოდში მასკი ცდილობდა OpenAI-ს მკვლევარების გადაბირებას და შეწყვიტა დაპირებული დაფინანსება.
სასამართლო დარბაზში დაძაბულობა იგრძნობოდა. OpenAI-ს პრეზიდენტი და თანადამფუძნებელი გრეგ ბროკმანი ჩვენების მიცემისას მასკს ცივი მზერით აკვირდებოდა. თავად მასკი აშკარად გაღიზიანებული ჩანდა და ხშირად აწყვეტინებდა ადვოკატს საუბარს, რადგან მიაჩნდა, რომ მისი კითხვები შეცდომაში შემყვანი იყო.
ძალაუფლებისთვის ბრძოლა და დაფინანსების შეწყვეტა
2017 წლის სექტემბრის მიმოწერაში, მასკი, ბროკმანი და ილია სუცკევერი OpenAI-ს კომერციული (for-profit) მიმართულების შექმნას განიხილავდნენ. მასკი ითხოვდა დირექტორთა საბჭოს ოთხი წევრის არჩევის უფლებას, რაც მას კო-ფაუნდერებზე მეტ ძალაუფლებას მისცემდა. სუცკევერმა ეს იდეა უარყო, რადგან შიშობდა, რომ მასკი კომპანიაზე სრულ კონტროლს მოიპოვებდა.
ამ მოლაპარაკებებამდე თვეებით ადრე, მასკმა შეწყვიტა OpenAI-ს დაფინანსება, რაც ორგანიზაციისთვის მძიმე დარტყმა იყო. 2016 წლიდან ის კვარტალურად 5 მილიონ დოლარს რიცხავდა, როგორც 1 მილიარდიანი დაპირების ნაწილი. 2017 წლის აგვისტოში, მასკის საოჯახო ოფისის ხელმძღვანელმა, ჯარედ ბირჩალმა მასკს ჰკითხა, გაეგრძელებინა თუ არა დაფინანსების შეკავება, რაზეც მასკმა მოკლედ უპასუხა: "დიახ."
კადრების გადაბირება Tesla-სა და Neuralink-ში
მას შემდეგ, რაც მასკმა კონტროლის მოპოვება ვერ შეძლო, მან დაიწყო OpenAI-ს თანამშრომლების თავის კომპანიებში გადაყვანა. 2017 წლის ივნისში მან Tesla-ში სამუშაოდ წაიყვანა OpenAI-ს ერთ-ერთი წამყვანი მკვლევარი, ანდრეი კარპათი (Andrej Karpathy). "OpenAI-ს ბიჭებს ჩემი მოკვლა ენდომებათ, მაგრამ ეს უნდა გამეკეთებინა", - წერდა მასკი ელექტრონულ წერილში. სასამართლოში მან განმარტა, რომ კარპათი ისედაც აპირებდა კომპანიის დატოვებას.
მასკმა Neuralink-ის კო-ფაუნდერს, ბენ რაპოპორტსაც მისცა უფლება, კადრები პირდაპირ OpenAI-დან აეყვანა. ადვოკატის კითხვაზე მასკმა უპასუხა, რომ თანამშრომლებისთვის მუშაობის შეზღუდვა უკანონო იქნებოდა და ადამიანებს უფლება აქვთ იმუშაონ იქ, სადაც სურთ.
2018 წლის თებერვალში მასკმა შივონ ზილისს (Shivon Zilis), რომელიც მაშინ OpenAI-ს ბორდის წევრი და Neuralink-ის აღმასრულებელი დირექტორი იყო, მისწერა: "ჩვენ აქტიურად ვეცდებით 3 ან 4 ადამიანის OpenAI-დან Tesla-ში გადმოყვანას." ამავე მიმოწერაში მან ზილისს ურჩია, OpenAI-სთან "ახლო და მეგობრული" ურთიერთობა შეენარჩუნებინა, მიუხედავად იმისა, რომ კადრების გადაბირებას გეგმავდნენ.
წყარო: wired.com
