Anthropic-ი ცდილობს, შეინარჩუნოს ბალანსი საჯარო ბაზრის კაპიტალსა და ხელოვნური ინტელექტის უსაფრთხო განვითარების მისიას შორის. კომპანიის მოსალოდნელი IPO-ს ფონზე, მთავარი გამოწვევა აქციონერთა მოთხოვნებია, რომლებიც ხშირად ეწინააღმდეგება უსაფრთხოების ხანგრძლივ და ძვირადღირებულ პროცედურებს.
კომპანიამ შეიმუშავა უნიკალური მმართველობითი სტრუქტურა, რომელიც, ექსპერტების აზრით, აქციონერებს შეზღუდულ გავლენას უტოვებს. Anthropic-ი არის საჯარო სარგებლის კორპორაცია (Public Benefit Corporation), რაც მას ავალდებულებს, მოგების მაქსიმიზაციასთან ერთად, სოციალური მისიაც გაითვალისწინოს. მმართველობის მთავარი ბერკეტი ე.წ. „გრძელვადიანი სარგებლის ტრასტია“ (Long-term benefit trust), რომელიც დამოუკიდებელი რწმუნებულებისგან შედგება და დირექტორთა საბჭოს უმრავლესობას ნიშნავს.
გარდა ამისა, დამფუძნებელთა ჯგუფი, Founder LLC-ის მეშვეობით, ინარჩუნებს ხმის მიცემის უფლების 50.1 პროცენტს, რაც მათ საშუალებას აძლევს, დაბლოკონ აქციონერთა ნებისმიერი გადაწყვეტილება. თუმცა, იურიდიული დაცვის მიუხედავად, ექსპერტები აფრთხილებენ კომპანიას, რომ საბაზრო რეალობა და კაპიტალის მუდმივი საჭიროება შესაძლოა აღმოჩნდეს უფრო ძლიერი, ვიდრე ნებისმიერი კორპორაციული სტრუქტურა. თუ კომპანიის ზრდა შენელდება, ინვესტორების უკმაყოფილება გარდაუვალი იქნება, ხოლო დამფუძნებლების წასვლის შემთხვევაში, არსებული დამცავი მექანიზმები შესაძლოა შესუსტდეს.
წყარო: theverge.com
