ათწლიანი წარმატებული მოღვაწეობის შემდეგ, რიდ ჰოფმანი ტოვებს Microsoft-ის დირექტორთა საბჭოს, განაცხადა კომპანიამ ხუთშაბათს. ჰოფმანი საბჭოს მას შემდეგ შეუერთდა, რაც Microsoft-მა მისი კომპანია LinkedIn 2016 წელს 26.2 მილიარდ დოლარად შეიძინა.
ჰოფმანი Microsoft-ის საბჭოს წევრი იყო მაშინაც, როდესაც კომპანიამ 2019 წელს პირველი 1 მილიარდი დოლარის ინვესტიცია ჩადო OpenAI-ში. იგი თავად იყო OpenAI-ს ერთ-ერთი პირველი ინვესტორი და 2023 წლამდე მის საბჭოშიც ირიცხებოდა. მან საბჭო ინტერესთა კონფლიქტის თავიდან ასაცილებლად დატოვა. გარდა ამისა, იგი Microsoft-ის საბჭოში იმყოფებოდა მაშინაც, როდესაც ტექნოლოგიურმა გიგანტმა 650 მილიონ დოლარად შეიძინა მისი კიდევ ერთი AI სტარტაპი Inflection AI, საიდანაც Microsoft-მა თანადამფუძნებელი მუსტაფა სულეიმანი აიყვანა სამუშაოდ.
თავის პოდკასტში „Possible“, Microsoft-ის CEO სატია ნადელასთან საუბრისას, ჰოფმანმა აღნიშნა, რომ მზად არის გადავიდეს „founder mode“-ში თავის ახალ AI სტარტაპ Manus-თან ერთად. Manus არის მედიკამენტების აღმოჩენაზე ფოკუსირებული ბიოტექნოლოგიური კომპანია, რომელმაც გასულ წელს seed რაუნდების მეშვეობით 50 მილიონ დოლარზე მეტი მოიზიდა. ჰოფმანი კომპანიის ერთ-ერთი ინვესტორია General Catalyst-თან ერთად.
Manus-ში ჰოფმანი მოხსენიებულია როგორც თანადამფუძნებელი და საბჭოს თავმჯდომარე. კომპანიის CEO-ს პოზიციას კი იკავებს დოქტორი სიდჰარტა მუკერჯი — ექიმი, ბიოლოგი და პულიცერის პრემიის ლაურეატი.
ჰოფმანის თქმით, Manus-ი უდიდეს პროგრესს აღწევს ე.წ. „Move 37“ ხელოვნური ინტელექტის მიმართულებით, რაც გულისხმობს AI-ს, რომელიც ქიმიის სფეროში ადამიანურ კრეატიულობას აჭარბებს, განსაკუთრებით კი კიბოს სხვადასხვა ფორმებთან ბრძოლაში.
წყარო: techcrunch.com
