Microsoft-ის პრეზიდენტი ბრედ სმიტი ხელოვნური ინტელექტის (AI) სფეროში სასწრაფო რეგულაციების შემოღებას ითხოვს. მისი თქმით, დღეს ისეთი ყოფითი პროდუქტები, როგორიცაა რძე ან სარეცხი მანქანები, უფრო მკაცრ ზედამხედველობას ექვემდებარება, ვიდრე AI-ის ტექნოლოგიების შემქმნელი კომპანიები.
BBC-ის პოდკასტში სმიტმა AI-ს უწოდა როგორც „იარაღი“, ისე „ინსტრუმენტი“, რომელიც გლობალურ კიბერუსაფრთხოებას საფრთხეს უქმნის. მისი აზრით, დადგა დრო, როდესაც საერთაშორისო უსაფრთხოების წესები უნდა დაინერგოს. სმიტის განცხადებით, ამ პროცესში ლიდერობა არა აშშ-ს ან ევროკავშირს, არამედ დიდ ბრიტანეთს შეუძლია. ბრიტანეთის AI უსაფრთხოების ინსტიტუტი (AISI) უკვე აქტიურად თანამშრომლობს წამყვან ლაბორატორიებთან და ახალი მოდელების ტესტირებას ახორციელებს.
მიუხედავად აშშ-ის პოლიტიკური წნეხისა, სმიტი მიიჩნევს, რომ ბრიტანეთს აქვს უნიკალური პოზიცია, რათა დაარეგულიროს AI ისე, როგორც ეს ვაშინგტონისთვის პოლიტიკურად რთულია. „ვაშინგტონში ლონდონს არ უყურებენ ისე, როგორც ბრიუსელს, და ეს ბრიტანეთის ძლიერი მხარეა“, — აღნიშნა მან.
ტექნოლოგიური ლიდერები, მათ შორის OpenAI-სა და Anthropic-ის ხელმძღვანელები, სულ უფრო ხშირად საუბრობენ AI-ის განვითარების ტემპის შენელების აუცილებლობაზე. თუმცა, სმიტი მიიჩნევს, რომ კომპანიების მიერ ხელმოწერილი „მორალურად სავალდებულო“ შეთანხმებები საკმარისი არ არის. მისი თქმით, ნებაყოფლობითი თვითრეგულირება მხოლოდ პასუხისმგებლიან კომპანიებზე მუშაობს, ხოლო მთავარი საფრთხე სწორედ არაკეთილსინდისიერი მოთამაშეებისგან მოდის.
სმიტი გვთავაზობს კონკრეტულ ზომებს: AI-ის სისტემების დარღვევის შემთხვევაში შეტყობინების სამართლებრივ ვალდებულებას, პროდუქტის გამოშვებამდე დამოუკიდებელი აუდიტორების მიერ შემოწმებას და ე.წ. „kill switch“-ის მექანიზმს, რომელიც ადამიანს კონტროლის დაკარგვის შემთხვევაში სისტემის გაჩერების საშუალებას მისცემს.
წყარო: techcrunch.com
