2021 წელს Anjuna Security სწრაფად იზრდებოდა, აგრესიულად ასაქმებდა კადრებს და მიჰყვებოდა ბაზარს, რომელიც უსაზღვროდ ჩანდა. წლის ბოლოსთვის, venture-backed კიბერუსაფრთხოების კომპანია დაახლოებით 75 თანამშრომლამდე გაიზარდა და ჰიპერზრდის მოლოდინში გაყიდვებისა და მომხმარებელთა მხარდაჭერის გუნდები ჩამოაყალიბა.
შემდეგ დადგა 2022 წელი.
ბაზრის ცვლილებასთან ერთად, კორპორატიული კლიენტების მოზიდვა გართულდა. ბევრი იმდროინდელი startup-ის მსგავსად, Anjuna-ც ფინანსური სირთულეების წინაშე აღმოჩნდა. კომპანია იძულებული გახდა რთული გადაწყვეტილება მიეღო და თანამშრომლების ნაწილი გაეთავისუფლებინა, რასაც თვეების შემდეგ შემცირებების კიდევ ერთი ტალღა მოჰყვა.
ხარჯების შემცირება გამოწვევის მხოლოდ ნაწილი იყო. მთავარი კითხვა მდგომარეობდა იმაში, თუ როგორ უნდა აღედგინათ პოზიციები და შეენარჩუნებინათ დარჩენილი გუნდის მოტივაცია.
Anjuna-ს CEO-მ და თანადამფუძნებელმა, Ayal Yogev-მა TechCrunch-თან ინტერვიუში ისაუბრა, თუ როგორ გადაურჩა კომპანია არასტაბილურ ბაზარს სწრაფი მოქმედებებით, გონივრული შემცირებებითა და ადრეულ ეტაპზე დაშვებულ შეცდომებზე სწავლით.
კულტურა, როგორც მთავარი საყრდენი
ერთ-ერთი მიზეზი, რის გამოც Anjuna-მ შემცირებების ორი ტალღის გადატანა შეძლო, იყო ძლიერი შიდა კულტურა, რომელიც მარტივ იდეას ეფუძნებოდა. „როდესაც საქმე კულტურას ეხება, ჩვენ მხოლოდ ერთი სიტყვა გვაქვს - ზრუნვა,“ აღნიშნა Yogev-მა. „ჩვენ ვზრუნავთ ჩვენს თანამშრომლებზე და კლიენტებზე.“
აბსტრაქტული ღირებულებების ნაცვლად, კომპანიამ აქცენტი თანმიმდევრულ ქცევაზე გააკეთა. შიდა დონეზე ეს გამჭვირვალობასა და მოვლენების შესახებ მკაფიო კომუნიკაციას ნიშნავდა. გარე დონეზე კი — წასული თანამშრომლების მხარდაჭერას კომპენსაციის მიღმა, ინვესტორთა ქსელის მეშვეობით დასაქმების ხელშეწყობითა და ჯანდაცვის სერვისებზე წვდომის შენარჩუნებით.
ნდობის შენარჩუნება და შეცდომებზე სწავლა
კომპანიამ თავიდან აირიდა ისეთი საერთო შეცდომები, რომლებიც შემცირებების დროს ნდობას ანგრევს, როგორიცაა გახანგრძლივებული გაურკვევლობა, უპიროვნო პროცესები ან მენეჯმენტის დუმილი. გადაწყვეტილებები მიიღებოდა სწრაფად, ხოლო კომუნიკაცია იყო პირდაპირი.
შემცირებების მეორე ტალღამ ნდობის აღდგენა გაართულა, თუმცა არსებულმა კულტურამ განსაზღვრა გუნდის რეაგირება. დამნაშავის ძიების ნაცვლად, ფოკუსი შეცდომების გაანალიზებაზე გაკეთდა.
„ცუდი კომპანიები ეძებენ დამნაშავეს, რაც ქმნის ისეთ კულტურას, სადაც ადამიანები მხოლოდ იმაზე ფიქრობენ, რომ შეცდომა არ დაუშვან. ეს სრულიად კონტრპროდუქტიულია,“ თქვა Yogev-მა.
დღეს Anjuna ახალი მიდგომით ვითარდება. დასაქმების პროცესი უფრო მიზანმიმართულია, გაყიდვების ზრდა მჭიდროდ არის დაკავშირებული რეალურ მოთხოვნასთან, ხოლო ახალი ინსტრუმენტები, მათ შორის AI, ეხმარება გუნდს იმოქმედოს უფრო ეფექტურად, ზედმეტი გაფართოების გარეშე.
წყარო: techcrunch.com
