ნაფიცმა მსაჯულებმა დაადგინეს, რომ Meta-მ გამიზნულად დაარღვია ნიუ-მექსიკოს შტატის კანონმდებლობა, როდესაც მომხმარებლები საკუთარი პროდუქტების უსაფრთხოების საკითხში შეცდომაში შეიყვანა და არაკეთილსინდისიერ სავაჭრო პრაქტიკას მიმართა. კომპანიას აღნიშნული დარღვევებისთვის 375 მილიონი აშშ დოლარის ოდენობის ჯარიმა დაეკისრება, რაც თითოეული 37,500 დარღვევისთვის მაქსიმალურ, 5,000 დოლარიან ჯარიმას გულისხმობს.
ეს არის ისტორიული ვერდიქტი. ნიუ-მექსიკოს შტატის მტკიცებით, Meta-მ დაარღვია კანონი იმით, რომ შეცდომაში შეიყვანა მომხმარებლები და ხელი შეუწყო ბავშვებზე მოძალადეების აქტივობას საკუთარ პლატფორმაზე. შტატმა Facebook-ზე სპეციალური, მოტყუებაზე გათვლილი ექაუნთები შექმნა, რომლებიც არასრულწლოვნების პროფილებს გავდა და დაადგინა, რომ ისინი მალევე აივსო ზრდასრულების შეტყობინებებით. Meta კატეგორიულად უარყოფს ბრალდებებს და აცხადებს, რომ შტატის გამოძიება ხარვეზიანი იყო.
მსგავს საქმეზე კიდევ ერთი ვერდიქტი მალე ლოს-ანჯელესშია მოსალოდნელი, სადაც სამიზნეს Google-ის YouTube-იც წარმოადგენს. ნიუ-მექსიკოს ვერდიქტი წარმოადგენს გენერალური პროკურორის, რაულ ტორესის მიერ არჩეული უნიკალური იურიდიული სტრატეგიის ისტორიულ გამარჯვებას, რომელიც ფოკუსირებულია უშუალოდ ტექნოლოგიური პლატფორმის დიზაინზე.
„ნიუ-მექსიკო ამაყობს, რომ არის პირველი შტატი, რომელმაც Meta-ს პასუხისმგებლობა დააკისრა მშობლების შეცდომაში შეყვანის, ბავშვთა ექსპლუატაციის ხელშეწყობისა და მათი დაზიანების გამო,“ - განაცხადა ტორესმა. შემდეგ ეტაპზე შტატი დამატებით ფინანსურ ჯარიმებსა და პლატფორმაზე სასამართლოს მიერ დავალებულ ცვლილებებს მოითხოვს.
„ჩვენ პატივისცემით არ ვეთანხმებით ვერდიქტს და გავასაჩივრებთ მას,“ - აღნიშნა Meta-ს სპიკერმა ფრენსის ბრენანმა. „ჩვენ მუდმივად ვმუშაობთ პლატფორმაზე ხალხის უსაფრთხოებისთვის. გავაგრძელებთ თავის დაცვას და დარწმუნებულნი ვართ თინეიჯერების ონლაინ დაცვის ჩვენს სტრატეგიაში.“
წყარო: theverge.com
