Shay Shwartz-მა ელექტრონული ფოსტის ფიშინგ შეტევების შესახებ ბევრი რამ იცის. თინეიჯერობისას ის ფულს ჰაკერობით შოულობდა, თუმცა 16 წლის ასაკში გამოჭერის შემდეგ მიხვდა, რომ თავისი კიბერ-ნიჭი შეტევების პრევენციისთვის უნდა გამოეყენებინა, ნაცვლად მათი განხორციელებისა.
მომდევნო ათწლეული მან კიბერუსაფრთხოების წამყვან პოზიციებზე გაატარა და ისრაელის ელიტური თავდაცვისა და დაზვერვის ქვედანაყოფების მასშტაბურ პროექტებს ხელმძღვანელობდა, მათ შორის Iron Dome-თან დაკავშირებულ პროექტს. მოგვიანებით ის შეუერთდა სტარტაპ Axis-ს, რომელიც შემდეგ HPE-მ შეისყიდა.
მთელი ამ ხნის განმავლობაში მას საკუთარი სტარტაპის შექმნა სურდა და ორი წლის წინ ეს ნაბიჯი საბოლოოდ გადადგა.
მისი სტარტაპი Ocean, რომელიც AI-ით მართულ შეტევებთან საბრძოლველად შეიქმნა, ფარული რეჟიმიდან გამოვიდა და ჯამში $28 მილიონის დაფინანსება მოიზიდა. რაუნდს ლიდერობდა Lightspeed Venture Partners, ასევე მონაწილეობდნენ Picture Capital და Cerca Partners. ინვესტიციაში ჩაერთნენ ცნობილი ანგელოზი ინვესტორებიც: Wiz-ის თანადამფუძნებელი და CEO Assaf Rappaport, ასევე Armis-ის თანადამფუძნებლები Yevgeny Dibrov და Nadir Izrael.
მიუხედავად იმისა, რომ ისეთი კომპანიები, როგორიცაა Proofpoint, Mimecast და Abnormal Security, სტანდარტული ფიშინგის აღმოჩენაში გვეხმარებიან, Shwartz ამტკიცებს, რომ AI სრულიად განსხვავებულ თავდაცვით მიდგომას მოითხოვს.
„AI-მ ფიშინგის პროცესი სრულად ავტომატური გახადა, ამიტომ მასშტაბები ახლა ბევრად დიდია,“ - აღნიშნავს Shwartz. „შემიძლია LLM-ს დავავალო, მოიძიოს დიდი რაოდენობით საჯარო ინფორმაცია თქვენს შესახებ და შექმნას უშუალოდ თქვენზე მორგებული მიზანმიმართული შეტევა.“
Ocean-ის განცხადებით, მათ AI-ს შეუძლია თითოეული შემომავალი წერილის კონტექსტის საფუძვლიანი ანალიზი, რათა თაღლითობის მცდელობები გამოავლინოს. სტარტაპი უკვე ამოწმებს მილიარდობით წერილს ისეთი კლიენტებისთვის, როგორებიცაა Kayak, Kingston Technology და Headspace.
Shwartz-ის თქმით, Ocean-მა შექმნა მცირე ენობრივი მოდელი, რომელიც სწრაფად აანალიზებს წერილებს, იგებს გამომგზავნის განზრახვას და აფასებს მას მომხმარებლის ორგანიზაციულ კონტექსტთან მიმართებაში. „ეს ყველა კართან მცველის დაყენებას ჰგავს. სწორედ ასე ვხდით ინბოქსს უსაფრთხო ადგილად,“ - დასძინა მან.
წყარო: techcrunch.com
