ციფრული ასისტენტები, როგორიცაა Read AI, Fireflies.ai, Fathom და Granola, ონლაინ შეხვედრების ჩაწერასა და ტრანსკრიფციაში გვეხმარება. თუმცა, პირისპირ შეხვედრებისთვის ბევრი ფიზიკურ ჩამწერ მოწყობილობას ანიჭებს უპირატესობას. ეს მოწყობილობები იწერს აუდიოს და AI-ის გამოყენებით მომხმარებლებს შეხვედრების რეზიუმეებსა და სამოქმედო ნაბიჯებს (action items) სთავაზობს.
ზოგიერთი მათგანი ტარებადი მოწყობილობაა — გულსაბნევები ან გულსაკიდები გამოყოფილი მიკროფონებით, ზოგი კი საკრედიტო ბარათის ზომისაა და სპეციალური მობილური აპლიკაციების საშუალებით, AI-ის დახმარებით, ტრანსკრიფციასა და მნიშვნელოვანი დეტალების ამოღებას უზრუნველყოფს. რამდენიმე მოდელი სინქრონულ თარგმანსაც კი გვთავაზობს.
Plaud Note/Plaud Note Pro
ეს საკრედიტო ბარათის ზომის მოწყობილობა 2023 წლიდანაა ბაზარზე. მის ახალ, AI-ზე მომუშავე Pro ვერსიას აქვს პატარა ეკრანი, ოთხი მიკროფონი და აუდიოს 3-დან 5 მეტრის რადიუსში იწერს. მას ასევე შეუძლია გადართვა პირისპირ და სატელეფონო საუბრების ჩაწერის რეჟიმებს შორის. Plaud Note 159 დოლარი ღირს, Note Pro კი — 179 დოლარი. ორივე მოწყობილობა თვეში 300 წუთ უფასო ტრანსკრიფციას მოიცავს.
Mobvoi TicNote
Mobvoi-ს მართკუთხა ჩამწერი 159 დოლარი ღირს და 600 უფასო ტრანსკრიფციის წუთს მოიცავს. კომპანიის განცხადებით, მოწყობილობა 120-ზე მეტ ენაზე რეალურ დროში ტრანსკრიფციასა და თარგმანს უზრუნველყოფს. მას სამი მიკროფონი აქვს და 25 საათის განმავლობაში უწყვეტი ჩაწერა შეუძლია. პროგრამული უზრუნველყოფის კუთხით, TicNote მთავარი დეტალების ავტომატურ ამოღებას და საუბრის პოდკასტის სტილის რეზიუმეების ან აუდიო კლიპების შექმნას გვთავაზობს.
Comulytic Note Pro
Comulytic შედარებით ახალი მოთამაშეა ტექნიკური AI ჩამწერების ბაზარზე. კომპანიის 159-დოლარიანი Note Pro-ს მთავარი უპირატესობა ისაა, რომ საბაზისო ტრანსკრიფციისთვის დამატებითი გამოწერა არ გჭირდებათ — ტრანსკრიფციის დრო შეუზღუდავია. მოწყობილობას 45 საათამდე უწყვეტი აუდიოს ჩაწერა შეუძლია და 100 დღეზე მეტი ლოდინის (standby) რეჟიმი აქვს. კომპანიას ასევე აქვს 15-დოლარიანი ყოველთვიური (ან 119-დოლარიანი წლიური) გეგმა, რომელიც მყისიერ AI რეზიუმეებს, შაბლონებს, action item-ების სიას და AI ასისტენტთან შეუზღუდავ ჩატს მოიცავს.
Plaud NotePin/Plaud NotePin S
Plaud NotePin და NotePin S უფრო მცირე ზომის ვერსიებია. NotePin-ს მრავალმხრივი დიზაინი აქვს: შეგიძლიათ ატაროთ როგორც მაჯის სამაჯური, გულსაკიდი, მიამაგროთ ჩანთაზე ან პერანგზე მაგნიტით. ორივე მოწყობილობას ორი მიკროფონი აქვს და დაახლოებით 20 საათის განმავლობაში უწყვეტად იწერს. NotePin S-ს ფიზიკური ღილაკი აქვს ჩაწერის დასაწყებად/შესაჩერებლად. ფასები შესაბამისად 159 და 179 დოლარია.
Omi pendant
Omi გულსაკიდი 89-დოლარიანი, უფრო ხელმისაწვდომი ალტერნატივაა. ის აუცილებლად უნდა დაუკავშირდეს თქვენს ტელეფონს და არ აქვს შიდა მეხსიერება. მოწყობილობას ორი მიკროფონი აქვს და 10-დან 14 საათამდე მუშაობს. მიუხედავად იმისა, რომ Omi-ს საკუთარი აპლიკაცია აქვს, შეგიძლიათ სხვა აპლიკაციების გამოყენებაც, რადგან მისი აპარატული და პროგრამული უზრუნველყოფა ღია კოდისაა (open source).
Viaim RecDot
Viaim-ის ყურსასმენები ზარების დროს ტრანსკრიფციის საშუალებას იძლევა, დამატებითი ჩამწერი ფუნქციით ყურსასმენების ქეისში. ისინი 200 დოლარი ღირს და, კომპანიის მტკიცებით, 78 ენაზე რეალურ დროში ტრანსკრიფცია შეუძლიათ. აპლიკაციას ასევე შეუძლია ტრანსკრიფციაში მთავარი პუნქტების მონიშვნა.
Anker Soundcore Work
Anker-ის Soundcore Work მონეტის ზომის AI ჩამწერია. 159-დოლარიან მოწყობილობას 8 საათის განმავლობაში შეუძლია ჩაწერა, ან 32 საათამდე, თუ ის თავის ქეისზეა მიმაგრებული. ჩაწერის რადიუსი 5 მეტრია, მომხმარებლები კი თვეში 300 წუთ უფასო ტრანსკრიფციას იღებენ.
Pocket კიდევ ერთი საკრედიტო ბარათის სტილის მოწყობილობაა, რომელიც ტელეფონის უკანა მხარეს მაგრდება. მისი ფასი 199 დოლარია, თუმცა ხშირად ფასდაკლებით იყიდება. ძირითადი ფუნქციების (მაგ. ტრანსკრიფციის) გამოსაყენებლად გამოწერა საჭირო არ არის. მხარს უჭერს 120-ზე მეტ ენას. მოწყობილობა იწონის 52 გრამს, აქვს 64GB შიდა მეხსიერება და 4 დღემდე მუშაობს. 19.99-დოლარიანი ყოველთვიური გამოწერა შეუზღუდავ cloud storage-ს, შაბლონებს და AI-ზე დაფუძნებულ სპიკერების იდენტიფიკაციას გთავაზობთ.
წყარო: techcrunch.com
