13 ოქტომბერს აშშ-ის ფედერალური კომუნიკაციების კომისიამ (FCC) ახალი უფლებამოსილება მიიღო, რომელიც მას საშუალებას აძლევს, დაბლოკოს ნებისმიერი მოწყობილობა, რომელიც შეიცავს ეროვნული უსაფრთხოებისთვის საფრთხის შემცველ კომპანიათა სიაში მყოფი მწარმოებლების ჩიპებს. კომისიამ ეს უფლება უკვე გამოიყენა და ორი მოწყობილობა დაბლოკა, რადგან ისინი შეიცავენ ე.წ. უცხოურ სათვალთვალო ჩიპებს.
კომისიამ არ დააკონკრეტა დაბლოკილი მოწყობილობების მოდელები, თუმცა დაასახელა კონკრეტული ჩიპი: HiVision Hi3516CV610 UHD Smart Vision SoC. აღნიშნული ჩიპი გამოიყენება კამერის სენსორების დასამუშავებლად და ხშირად გვხვდება სახლის უსაფრთხოების კამერებსა თუ ვიდეორეგისტრატორებში. FCC-ის განცხადებით, ჩიპი მიჩნეულია საფრთხედ, რადგან მისი მწარმოებელი HiVision არის Huawei-ის შვილობილი კომპანია, რომელიც აშშ-ის მთავრობის მიერ ეროვნული უსაფრთხოების რისკად არის მიჩნეული.
HiVision-ის მარკეტინგული მასალების თანახმად, ჩიპი სპეციალურად სათვალთვალო ბაზრისთვისაა შექმნილი და მოიცავს სახის ამოცნობის ალგორითმებს. FCC-ის ახალი რეგულაცია მიზნად ისახავს იმ ხარვეზის აღმოფხვრას, რომელიც კომპანიებს საშუალებას აძლევდა, აკრძალული მწარმოებლების კომპონენტები სხვა ბრენდების მოწყობილობებში შეეტანათ.
მიუხედავად ამ ნაბიჯისა, კვლავ ღია რჩება კითხვა: რამდენად ზრდის ეს ზომები რეალურ უსაფრთხოებას და რამდენად არის ეს პროცესი მიმართული ბაზრის რეგულირებისკენ, ვიდრე კონკრეტული პოლიტიკური მიზნების მიღწევისკენ. FCC-მ აღნიშნულ საკითხზე კომენტარის გაკეთებაზე უარი განაცხადა.
წყარო: theverge.com
