Alphabet-ის ავტონომიური სატრანსპორტო კომპანია Waymo-ს ყოფილი ფინანსური დირექტორი (CFO) ელისა დე მარტელი, ანალოგიურ პოზიციას ავტონომიური მართვის ტექნოლოგიების სტარტაპ Wayve-ში დაიკავებს. მოქმედი ფინანსური დირექტორი მაქს უორბერტონი, რომელიც კომპანიაში 2024 წლიდან მუშაობდა, სტრატეგიული მრჩევლის როლზე გადადის.
ელისა დე მარტელის დანიშვნა ემთხვევა Wayve-ს განვითარების კრიტიკულ ეტაპს, როდესაც კომპანია ტესტირების ფაზიდან ტექნოლოგიების მასშტაბურ დანერგვაზე გადადის, როგორც რობოტაქსების, ისე სამომხმარებლო ავტომობილების მიმართულებით. დე მარტელს, რომელიც კალიფორნიიდან იმუშავებს, ტექნოლოგიურ სექტორში მუშაობის მდიდარი გამოცდილება აქვს, მათ შორის Apple-სა და Carbon-ში. Waymo-ში მუშაობის პერიოდში მან კომპანიის კომერციალიზაციასა და 5.6 მილიარდი დოლარის მოზიდვაში მიიღო მონაწილეობა.
2017 წელს დაარსებული Wayve, რომლის საბაზრო ღირებულება დაახლოებით 8.5 მილიარდ დოლარს შეადგენს, ინვესტორების ყურადღებას თავისი უნიკალური მიდგომით იპყრობს. კომპანია იყენებს ენდ-ტუ-ენდ ნეირონულ ქსელს, რომელიც არ საჭიროებს მაღალი გარჩევადობის რუკებს ან სპეციალიზებულ აპარატურას, არამედ მხოლოდ მონაცემებზე დაყრდნობით სწავლობს ავტომობილის მართვას.
Wayve-ს ტექნოლოგია საფუძვლად უდევს ორ პროდუქტს: მძღოლის დამხმარე სისტემას და სრულად ავტომატიზებულ მართვის სისტემას. კომპანიამ უკვე დაამყარა სტრატეგიული პარტნიორობა ისეთ გიგანტებთან, როგორებიც არიან Nissan და Stellantis, ხოლო ლონდონში უკვე დაიწყო საჯარო სატესტო მგზავრობები. დე მარტელის მთავარი ამოცანა იქნება ფინანსური სტრატეგიის მართვა და კომპანიის ტრანსფორმაცია ავტოინდუსტრიის მასშტაბურ მიმწოდებლად.
წყარო: techcrunch.com
