Alphabet-ის საკუთრებაში მყოფმა კომპანია Waymo-მ ლას-ვეგასში საზოგადოებისთვის რობოტაქსების სერვისის გაშვება დაიწყო. ეს გადაწყვეტილება ნევადის სატრანსპორტო მარეგულირებლებისგან საბოლოო ნებართვის მიღებიდან რამდენიმე კვირაში იქნა მიღებული.
კომპანია სერვისს ეტაპობრივად ნერგავს, რაც უკვე ნაცადი სტრატეგიაა სხვა 14 ქალაქისთვის. ამ ეტაპზე Waymo ლას-ვეგასში ათობით Ojai-ს ტიპის მინივენით ოპერირებს, რომლებიც მოიცავს ლას-ვეგასის სტრიპის სამხრეთ ნაწილსა და ბოულდერ ჯანქშენს. მომხმარებლებს სერვისით სარგებლობისთვის მოწვევის კოდის მიღება სჭირდებათ, თუმცა, როგორც წესი, Waymo სრულ წვდომას ოფიციალური გაშვებიდან ერთ-ორ თვეში ხსნის.
ლას-ვეგასი Waymo-სთვის რიგით მე-15 ბაზარია. კონკურენცია ამ სექტორში მზარდია: ქალაქში უკვე ოპერირებს Zoox, ხოლო Tesla და Motional საკუთარი კომერციული სერვისების გაშვებას გეგმავენ. ნევადის სატრანსპორტო ორგანომ Waymo-ს, Tesla-სა და Uber-ს კლარკის ოლქში ავტონომიური ტაქსების ოპერირების ნებართვა მისცა.
მიუხედავად იმისა, რომ მარეგულირებლის მიერ გაცემული ლიცენზიები მომდევნო 12 თვის განმავლობაში 7 000-მდე რობოტაქსის განთავსების შესაძლებლობას იძლევა, ექსპერტები მიიჩნევენ, რომ კომპანიები ამ მაჩვენებელს მალე ვერ მიაღწევენ. დღეისათვის Waymo-ს მთლიანი ავტოპარკი 4 000-ზე მეტ ავტომობილს შეადგენს, რომლებიც აშშ-ის მასშტაბით სხვადასხვა ქალაქშია გადანაწილებული.
წყარო: techcrunch.com
