პერსონალური AI აგენტების ბაზარი სულ უფრო კონკურენტული ხდება. Meta-ს Muse-ის, OpenAI-ს Dot-ისა და Instinct-ის ფონზე, ვენჩურული კაპიტალის ლეგენდა Vinod Khosla ფსონს Google-ისა და DeepMind-ის ყოფილი ინჟინრის, Shivani Poddar-ის სტარტაპზე, Wajo-ზე დებს. მთავარი მიზეზი კი მარტივია: ნდობა.
Khosla-ს თქმით, როდესაც AI აგენტი თქვენს სახელით მოქმედებს, ნდობა გადამწყვეტი ფაქტორია. „ვინ ისურვებდა საკუთარი მონაცემების Meta-სთვის გადაცემას? მე არა. როდესაც მონაცემებს Facebook-ს აძლევთ, თქვენ თავად ხდებით პროდუქტი, რადგან მათი ბიზნესმოდელი რეკლამაზეა აგებული“, — აღნიშნავს Khosla. Wajo-ს არქიტექტურა კი თავიდანვე უსაფრთხოებასა და კონფიდენციალურობაზეა ორიენტირებული.
Wajo-ს აგენტი, სახელად Fo, მუშაობს iMessage-სა და WhatsApp-ში, ასევე აქვს ვებ-ინტერფეისი. ის ეხმარება მომხმარებლებს დაგეგმვაში, საჩუქრების შერჩევასა და ყოველდღიური საქმეების მართვაში. ერთ-ერთი გამორჩეული ფუნქციაა ვირტუალური საკრედიტო ბარათის შექმნა, რაც მომხმარებელს საშუალებას აძლევს, გადახდები განახორციელოს პირადი მონაცემების გამჟღავნების გარეშე. საჭიროების შემთხვევაში, აგენტს შეუძლია ადამიანური რესურსის ჩართვაც კი დავალების შესასრულებლად.
Shivani Poddar, რომელსაც Google-სა და Meta-ში მუშაობის მდიდარი გამოცდილება აქვს, ხაზს უსვამს, რომ ნდობა „დღე ნულიდან“ უნდა შენდებოდეს. „ტექნოლოგიური გამოწვევაა აგენტების სწავლება მონაცემების დავიწყებაზე. თუ მათ თავიდანვე აქვთ წვდომა თქვენს პირად ინფორმაციაზე, ეს მონაცემები სისტემაში რჩება. ჩვენი არქიტექტურა კი ამ პრობლემას პრევენციულად წყვეტს“, — აცხადებს Poddar.
მიუხედავად იმისა, რომ სტარტაპმა არ გაასაჯაროვა მოზიდული ინვესტიციების მოცულობა, ცნობილია, რომ პროექტს მხარს უჭერენ ისეთი ინდუსტრიის ლიდერები, როგორებიც არიან Jeff Dean და Gokul Rajaram. Wajo უკვე ოპერირებს 107 ქვეყანაში და სექტემბრის ბოლოდან მოყოლებული, მომხმარებელთა ბაზა 10-ჯერ გაზარდა.
წყარო: techcrunch.com
