ულტრაბიუჯეტურმა ავიაკომპანია Spirit Airlines-მა 34-წლიანი მუშაობის შემდეგ ოპერირება შეწყვიტა და შაბათს ყველა ფრენა გააუქმა. კომპანიის ვებსაიტი მომხმარებლებს spiritrestructuring.com-ზე ამამისამართებს და მგზავრებს აფრთხილებს, რომ აეროპორტებში არ მივიდნენ.
კომპანიის განცხადებით, ბილეთების თანხის დაბრუნების პროცესი უკვე დაწყებულია მათთვის, ვინც შესყიდვა საკრედიტო ან სადებეტო ბარათით განახორციელა. Spirit-ის იურისტის თქმით, დახურვა საფრთხეს უქმნის 17,000-მდე სამუშაო ადგილს, რადგან კომპანიას 2,000-ზე მეტი პილოტი და ათასობით სხვა თანამშრომელი ჰყავდა.
სხვა ავიაკომპანიებმა, მათ შორის Southwest, JetBlue, American Airlines, United და Frontier, დაზარალებული მგზავრებისთვის სპეციალური ფასდაკლებები და ალტერნატიული მარშრუტები გამოაცხადეს.
Spirit-ის დახურვა მოჰყვა ბიზნესის რესტრუქტურიზაციის მცდელობებს, რომელიც ნავთობის ფასების ბოლოდროინდელმა მკვეთრმა ზრდამ და ფინანსურმა წნეხმა შეიწირა. კომპანიის პრეზიდენტისა და CEO-ს, დეივ დევისის (Dave Davis) თქმით, საწვავის ფასების მოულოდნელმა და ხანგრძლივმა ზრდამ მათ სხვა არჩევანი არ დაუტოვა, რადგან ბიზნესის შენარჩუნებას ასობით მილიონი დოლარის ლიკვიდობა სჭირდებოდა, რაც კომპანიას არ გააჩნდა.
ბოლო ორი წლის განმავლობაში Spirit-მა უკვე მეორედ გამოაცხადა გაკოტრება და 2019 წლის შემდეგ მოგებაზე არ გასულა. 2022 წელს JetBlue-ის მიერ მისი შესყიდვის მცდელობა სასამართლომ დაბლოკა, ასევე ჩაიშალა Frontier-თან შერწყმის გეგმაც.
2019 წლის ბოლოს Spirit-მა ახალი თვითმფრინავების იჯარისთვის მილიარდობით დოლარის ვალი აიღო, რასაც მალევე Covid-19-ის პანდემია და Pratt & Whitney-ის ძრავების დეფექტის გამო ფლოტის 20%-ის გაჩერება დაემატა. საბოლოო დარტყმა ირანის ომის გამო გაორმაგებული საწვავის ფასები აღმოჩნდა.
Reuters-ის ცნობით, თეთრ სახლთან მიმდინარე მოლაპარაკებები 500 მილიონი დოლარის დაფინანსების შესახებ, რომელიც Spirit-ის აქციების 90%-ის სანაცვლოდ განიხილებოდა, უშედეგოდ დასრულდა.
წყარო: theverge.com
