აქციების ვარდნისა და მოსალოდნელი შემცირებების მიუხედავად, PayPal მომავლისკენ იყურება. პირველი კვარტლის მოგების ანგარიშის წარდგენისას, CEO-მ, ენრიკე ლორესმა (Enrique Lores) ინვესტორებს განუცხადა, რომ კომპანიამ „ფუნდამენტურ პრინციპებზე უნდა მოახდინოს ფოკუსირება“, რაც „კვლავ ტექნოლოგიურ კომპანიად ქცევას“ გულისხმობს.
ცხადი იყო, რომ PayPal AI-ზე დაფუძნებული გარდაქმნის სტრატეგიას აანონსებდა.
ლორესმა ანალიტიკოსებთან საუბრისას აღნიშნა, რომ წამყვანი კომპანიები ინოვაციებით გამოირჩევიან და ახლა PayPal-ის მოქმედების დროა. ეს მოიცავს ტექნოლოგიური პლატფორმის მოდერნიზაციას, „cloud-native“ მიდგომაზე სწრაფ გადასვლას და „განვითარების პროცესებში AI-ს აგრესიულ დანერგვას“. მისი თქმით, ეს უკანასკნელი დეველოპერების პროდუქტიულობას გაზრდის და ბაზარზე პროდუქტის გატანის დროს შეამცირებს.
საკმაოდ მოულოდნელია, რომ PayPal-ს ჯერ კიდევ არ დაუნერგავს AI სრულად შიდა პროცესებში, მაშინ როცა AI-ის დახმარებით კოდირება ტექნოლოგიის ერთ-ერთი ყველაზე წარმატებული მიმართულებაა. მაგალითად, Spotify-მ ჯერ კიდევ თებერვალში განაცხადა, რომ მათ წამყვან დეველოპერებს დეკემბრის შემდეგ კოდის არც ერთი ხაზი არ დაუწერიათ.
როგორც ჩანს, PayPal მხოლოდ ახლა ცდილობს ფეხი აუწყოს ტენდენციებს. ლორესის განცხადებით, კომპანიამ შექმნა ახალი „AI ტრანსფორმაციისა და გამარტივების“ გუნდი. დაგეგმილ შემცირებებთან ერთად, რასაც ლორესი ორგანიზაციული სტრუქტურის გამარტივებას უწოდებს, AI-ზე დაფუძნებული პროცესების დამატება მომდევნო 2-3 წელიწადში კომპანიას სულ მცირე 1.5 მილიარდი დოლარის დანაზოგს მოუტანს.
გასულ კვირას კომპანიამ ბიზნესის რეორგანიზაცია დააანონსა, რაც ოპერაციებს სამ სეგმენტად ჰყოფს: checkout solutions და PayPal, consumer financial services (და Venmo), და payment services და crypto. Bloomberg-ის ცნობით, ხარჯების შემცირების გეგმის ფარგლებში, PayPal მომდევნო 2-3 წელიწადში თანამშრომლების 20%-ის, ანუ 4,500-ზე მეტი სამუშაო ადგილის შეკვეცას გეგმავს.
AI-ს დანერგვა კოდირების გარდა სხვა სფეროებშიც იგეგმება, როგორიცაა მომხმარებელთა მომსახურება და რისკების მართვა. „ვფიქრობ, AI-ის საშუალებით განხორციელებული ცვლილებები ძალიან მნიშვნელოვანი იქნება“, — აღნიშნა ლორესმა.
AI-ზე ორიენტირებული ხარჯების შემცირება და ათასობით სამუშაო ადგილის გაუქმება ტექნოლოგიის მთავარ კრიტიკას — მის ადამიანურ დანაკარგს — უსვამს ხაზს. თუმცა, აღსანიშნავია, რომ PayPal-ს რესტრუქტურიზაცია ისედაც სჭირდებოდა. პირველ კვარტალში შემოსავალმა 8.4 მილიარდი დოლარი შეადგინა (7%-იანი ზრდა), მაგრამ მეორე კვარტლის სუსტმა პროგნოზმა აქციების ფასის ვარდნა გამოიწვია. პოსტ-პანდემიური პერიოდის განმავლობაში, PayPal-ის აქციები 2021 წლის მაქსიმუმთან შედარებით 80%-ით შემცირდა.
კითხვაზე, გულისხმობს თუ არა Venmo-ს ცალკე ბიზნესად გამოყოფა მის შესაძლო გაყიდვას, ლორესმა უპასუხა, რომ ამ ეტაპზე ეს ყველაზე გონივრული ნაბიჯია ტრანსფორმაციის გეგმის ფარგლებში. თუმცა, მან მომავალი გარიგებების შესაძლებლობაც არ გამორიცხა და განაცხადა, რომ მისი „ნომერ პირველი პრიორიტეტი აქციონერთა ღირებულების მაქსიმიზაციაა“.
წყარო: techcrunch.com
