The Wall Street Journal-ის ინფორმაციით, OpenAI-მა სმარტფონების კამერების ტექნოლოგიების სტარტაპი Glass Imaging 300 მილიონ დოლარზე მეტად შეიძინა. 2019 წელს დაარსებულმა კალიფორნიულმა კომპანიამ, რომელმაც მანამდე დაახლოებით 30 მილიონი დოლარის ინვესტიცია მოიზიდა, მნიშვნელოვანი როლი ითამაშა მობილური ფოტოგრაფიის განვითარებაში.
Glass Imaging-ის დამფუძნებლები, ზივ ატარი და ტომ ბიშოპი, Apple-ის ყოფილი ინჟინრები არიან, რომლებმაც თავის დროზე Apple-ის ცნობილი Portrait Mode-ის შექმნას უხელმძღვანელეს. მათი მიდგომა ეფუძნება ხელოვნური ინტელექტის გამოყენებას სმარტფონის კამერების ფიზიკური შეზღუდვების დასაძლევად. ნაცვლად ფოტოს გადაღების შემდგომი დამუშავებისა, Glass Imaging-ის ნეირონული ქსელები სწავლობენ კონკრეტული კამერის სისტემებს, რათა გამოსახულების ხარისხი უშუალოდ გადაღების მომენტში გააუმჯობესონ.
OpenAI-ს ოფიციალური კომენტარი ჯერ არ გაუკეთებია. ინდუსტრიაში გავრცელებული ხმების თანახმად, ChatGPT-ის შემქმნელი კომპანია საკუთარი აპარატურული უზრუნველყოფის, მათ შორის სმარტფონებისა და AI-ზე დაფუძნებული მოწყობილობების შექმნაზე მუშაობს. აღსანიშნავია, რომ 2025 წელს OpenAI-ის აღმასრულებელმა დირექტორმა სემ ალტმანმა და Apple-ის ლეგენდარულმა დიზაინერმა ჯონი აივმა დაადასტურეს თანამშრომლობა სტარტაპ io-ზე, რასაც მოგვიანებით OpenAI-ის მიერ აივის კომპანიის 6.5 მილიარდ დოლარად შეძენა მოჰყვა.
წყარო: techcrunch.com
