ხელოვნური ინტელექტის სფეროში უსაფრთხოებისა და მოდელების სწორი განვითარების პრიორიტეტულობის ფონზე, Microsoft-მა გამოაქვეყნა AI-ის ქცევის ახალი კოდექსი. დოკუმენტი მიზნად ისახავს მოდელების მართვას და მათთვის სახიფათო ქმედებების აკრძალვას.
Microsoft-ის დოკუმენტი პროგნოზირებს, რომ მომდევნო ათწლეულში სუპერინტელექტუალური სისტემები ადამიანის შესაძლებლობებს უმეტეს სფეროში გადააჭარბებს. კომპანიის განცხადებით, ასეთი ძლიერი ტექნოლოგიის კონტროლი და ადამიანურ ღირებულებებთან შესაბამისობაში მოყვანა კაცობრიობის წინაშე მდგარი ერთ-ერთი უდიდესი გამოწვევაა.
კოდექსი ადგენს ფუნდამენტურ პრინციპებს, რომელთა მიხედვითაც AI უნდა ემსახურებოდეს ადამიანის მხარდაჭერას და არა მის ჩანაცვლებას. დოკუმენტში გაწერილია „აბსოლუტური შეზღუდვები“, რომლებიც კრძალავს კიბერშეტევებს, ბირთვულ იარაღთან დაკავშირებულ ქმედებებსა და დიფფეიკების (deepfake) შექმნას. გარდა ამისა, მოდელებს ეკრძალებათ ისეთი მექანიზმების გამოყენება, რომლებიც მიზნად ისახავს ადამიანური კონტროლის გვერდის ავლას ან სისტემის გათიშვის პრევენციას.
Microsoft-ის აღმასრულებელი დირექტორის, Satya Nadella-ს თქმით, კომპანია მხარს უჭერს AI-ის უსაფრთხოების კვლევებს და მიესალმება ინიციატივებს, რომლებიც მიმართულია მოდელების სწორი განვითარებისა და მათი ეფექტური მონიტორინგისკენ. ეს ნაბიჯი Microsoft-ს აერთიანებს OpenAI-სა და Anthropic-ის მსგავს კომპანიებთან, რომლებიც აქტიურად მუშაობენ ხელოვნური ინტელექტის ეთიკურ და უსაფრთხო დანერგვაზე.
წყარო: techcrunch.com
