Microsoft-მა პარასკევს გამოაცხადა Windows 11-ის ოპერაციული სისტემის ხარისხის გაუმჯობესებაზე ორიენტირებული ცვლილებების სერია, რაც, პირველ რიგში, AI ასისტენტზე, Copilot-ზე წვდომის წერტილების შემცირებას გულისხმობს.
კომპანიის განცხადებით, შემცირდება Copilot AI ინტეგრაციები ზოგიერთ აპლიკაციაში, მათ შორის Photos, Widgets, Notepad და Snipping Tool.
Pavan Davuluri-მ, Windows-ისა და მოწყობილობების მიმართულების აღმასრულებელმა ვიცე-პრეზიდენტმა, კომპანიის ბლოგზე დაწერა, რომ Microsoft უფრო მიზანმიმართული ხდება იმის მიმართ, თუ „როგორ და სად ხდება Copilot-ის ინტეგრირება Windows-ში“. მისი თქმით, მთავარი მიზანია ფოკუსირება იმ AI გამოცდილებაზე, რომელიც „ნამდვილად სასარგებლოა“.
AI-ის არსებულ პლატფორმებში ინტეგრირების ეს მიდგომა შესაძლოა ასახავდეს მომხმარებელთა მზარდ უკმაყოფილებას AI-ის გადაჭარბებული გამოყენების გამო. მიუხედავად იმისა, რომ ბევრი ადამიანი AI-ს სასარგებლო ინსტრუმენტად მიიჩნევს, არსებობს სანდოობისა და უსაფრთხოების პრობლემები. მაგალითად, Pew Research-ის ამ თვეში გამოქვეყნებული კვლევის თანახმად, 2025 წლის ივნისის მდგომარეობით, აშშ-ის ზრდასრულთა ნახევარი უფრო მეტად შეშფოთებულია, ვიდრე აღფრთოვანებული AI-ით.
ეს არ არის პირველი შემთხვევა, როდესაც Microsoft-მა Copilot-ის ინტეგრაციებს გადახედა. ამ თვის დასაწყისში, Windows Central-მა განაცხადა, რომ კომპანიის გეგმა, დაენერგა Copilot-ბრენდირებული AI ფუნქციები Windows 11-ში, ჩუმად შეჩერდა, რაც მოიცავდა სისტემური დონის ინტეგრაციებს Settings აპლიკაციაში, File Explorer-ში და სხვაგან.
მანამდე, Microsoft-მა ერთ წელზე მეტით გადადო AI-ზე დაფუძნებული მეხსიერების ფუნქციის, Windows Recall-ის გაშვება Copilot + PC-ებისთვის, რათა მომხმარებელთა კონფიდენციალურობის პრობლემები მოეგვარებინა. მიუხედავად იმისა, რომ Recall ფუნქცია გასულ აპრილში ჩაეშვა, უსაფრთხოების ხარვეზები კვლავ ვლინდება.
ნათელია, რომ მომხმარებელთა უკუკავშირი გავლენას ახდენს Microsoft-ის ნაბიჯებზე Windows-ში AI-ის მიმართულებით. Davuluri-მ აღნიშნა, რომ მან და მისმა გუნდმა ბოლო რამდენიმე თვე საზოგადოების მოსმენას დაუთმეს.
Copilot-ის ინტეგრაციის შემცირება მხოლოდ ერთ-ერთი ცვლილებაა. კომპანიამ ასევე დააანონსა ეკრანზე taskbar-ის გადაადგილების შესაძლებლობა, სისტემის განახლებებზე მეტი კონტროლი, File Explorer-ის აჩქარება, Widgets-ის გაუმჯობესება და Windows Insider Program-ში ნავიგაციის გამარტივება.
წყარო: techcrunch.com
