Meta-ს ტექნოლოგიურმა დირექტორმა (CTO) ენდრიუ ბოსვორთმა თანამშრომლებისთვის გაგზავნილ შიდა წერილში აღიარა, რომ კომპანიის ხელოვნური ინტელექტის (AI) ახალი დივიზიის ფორმირების პროცესი „საშინლად“ წარიმართა. ბოსვორთის თქმით, კომპანია გეგმავს კორპორატიული კულტურის გაუმჯობესებას უკეთესი კომუნიკაციის, კარიერული ზრდის შესაძლებლობებისა და სამუშაო გარემოს გაუმჯობესების გზით.
ცვლილებები მას შემდეგ დაიგეგმა, რაც Applied AI-ის გუნდში, რომელიც 6500-მდე ინჟინერსა და პროდუქტის მენეჯერს აერთიანებს, უკმაყოფილება გამწვავდა. თანამშრომლები უკმაყოფილონი იყვნენ მენეჯმენტის სტრუქტურის ხშირი ცვლილებებითა და დავალებების სპეციფიკით. ბოსვორთმა აღიარა, რომ ხელმძღვანელობამ ვერ შეძლო თანამშრომლებისთვის მკაფიო ხედვის წარდგენა და მათი კარიერული განვითარების მხარდაჭერა.
კომპანია გეგმავს მენეჯერების დატვირთვის შემცირებას და თანამშრომლებისთვის მეტი თავისუფლების მიცემას შიდა პოზიციების არჩევისას. მიუხედავად იმისა, რომ Meta აგრძელებს AI-ზე ფოკუსირებას, ხელმძღვანელობა აცხადებს, რომ „AI არ ჩაანაცვლებს ადამიანებს, თუმცა მათ, ვინც AI-ს ფლობს, შესაძლოა ჩაანაცვლონ ისინი, ვინც ამ ტექნოლოგიას არ იყენებს“.
კორპორატიული სულისკვეთების ასამაღლებლად, ბოსვორთმა პირობა დადო, რომ გაზრდის ბიუჯეტს სოციალური ღონისძიებებისთვის, მივლინებებისთვის და გააუმჯობესებს ოფისებში არსებულ სამზარეულოებსა და დასასვენებელ ზონებს, რათა კომპანიაში მუშაობა კვლავ „სახალისო და სასიამოვნო“ გახდეს.
წყარო: wired.com
