Meta აქტიურად ცდის სახის ამომცნობ პროგრამულ უზრუნველყოფას, რომელიც შექმნილია კომპანია Rank One Computing-ის მიერ. აღნიშნული კომპანია ცნობილია თავისი სათვალთვალო ინსტრუმენტებით, რომლებსაც აშშ-ს სამხედრო უწყებები და სამართალდამცავი ორგანოები იყენებენ.
WIRED-ის მიერ მოპოვებული დოკუმენტების თანახმად, Meta-მ ლიცენზია მიიღო Rank One-ის ტექნოლოგიაზე, რომელიც მოიცავს სახის ამოცნობასა და ე.წ. „ცოცხალი ობიექტის“ (liveness detection) იდენტიფიკაციას. ეს სისტემა ინტეგრირებული იყო Meta AI-ის სატესტო ვერსიაში, რომელიც Ray-Ban და Oakley-ის ჭკვიანი სათვალეების მუშაობას უზრუნველყოფს. მიუხედავად იმისა, რომ ეს ფუნქციონალი მომხმარებლებისთვის არასდროს ყოფილა აქტიური, კოდის ანალიზმა აჩვენა, რომ სისტემის კვალი აპლიკაციაში მიმდინარე თვემდე რჩებოდა.
Rank One Computing-ი, რომელიც 2015 წელს დაარსდა, მჭიდროდ თანამშრომლობს აშშ-ს სპეცსამსახურებთან. კომპანიის ხელმძღვანელობაში FBI-სა და CIA-ს ყოფილი მაღალჩინოსნები შედიან. მათი ტექნოლოგია გამოიყენება როგორც პატიმართა იდენტიფიკაციისთვის, ისე სკოლებში უსაფრთხოების მონიტორინგისთვის.
ექსპერტები აღნიშნავენ, რომ ეს შემთხვევა ნათლად აჩვენებს ზღვარის წაშლას სამხედრო/სამართალდამცავ სათვალთვალო ტექნოლოგიებსა და მასობრივი მოხმარების სამომხმარებლო პროდუქტებს შორის. მიუხედავად იმისა, რომ Meta-მ 5 ივნისს აპლიკაციიდან სახის ამომცნობი სისტემა სრულად წაშალა, კომპანია უარს აცხადებს Rank One-თან თანამშრომლობის დეტალების განმარტებაზე.
ტექნოლოგიური ეთიკის სპეციალისტები აფრთხილებენ საზოგადოებას, რომ სათანადო რეგულაციების გარეშე, მაღალი სიზუსტის სახის ამომცნობი სისტემების მასობრივ პროდუქტებში დანერგვა კონფიდენციალურობის კუთხით სერიოზულ რისკებს შეიცავს.
წყარო: wired.com
