Meta-ს ტექნიკური დირექტორის (CTO) ენდრიუ ბოსვორთის Instagram-ის პოსტის თანახმად, კომპანია Horizon Worlds-ისთვის VR მხარდაჭერას არ აუქმებს.
"სწორედ დღეს გადავწყვიტეთ, რომ Horizon Worlds-ის VR-ში მუშაობას შევინარჩუნებთ," განაცხადა ბოსვორთმა Instagram Stories-ის Q&A სესიაზე მას შემდეგ, რაც აპლიკაციის ერთ-ერთმა გულშემატკივარმა აღნიშნა, რომ გაუქმების გადაწყვეტილებით "გულგატეხილი" იყო. Meta-ს წარმომადგენელმა TechCrunch-თან ბოსვორთის კომენტარი დაადასტურა.
მიმდინარე წლის დასაწყისში Meta-მ განაცხადა, რომ სოციალური მეტავერსის აპლიკაციის მხარდაჭერას Quest-ის ვირტუალური რეალობის მოწყობილობებზე შეწყვეტდა. სამშაბათს, Meta-მ თემის ფორუმებზე დაადასტურა, რომ 15 ივნისიდან Horizon Worlds მხოლოდ ვებსა და მობაილზე იქნებოდა ხელმისაწვდომი, თუმცა ეს განცხადება მალევე შეიცვალა.
მიუხედავად იმისა, რომ Horizon Worlds კვლავ ხელმისაწვდომი იქნება Quest-ზე, მისი გაუქმების თავდაპირველი გეგმა აჩვენებს, რომ მეტავერსი Reality Labs-ის დაფინანსებისთვის შავ ხვრელად იქცა. ამ განყოფილებამ 2021 წლის შემდეგ (როდესაც კომპანიამ Facebook-დან Meta-ზე რებრენდინგი განიცადა) 73 მილიარდი დოლარი დაკარგა.
ტექნოლოგიური ბაზრის კვლევითი კომპანია IDC-ის მონაცემებით, Meta-ს Quest მოწყობილობების გაყიდვები 2024-დან 2025 წლამდე 16%-ით შემცირდა. მარტო Meta არ აწყდება გამოწვევებს ვირტუალურ რეალობაში – Apple-საც მოუწია 3,500-დოლარიანი Vision Pro-ს წარმოების შემცირება დაბალი მოთხოვნის გამო.
იანვარში Meta-მ Reality Labs-ის განყოფილებაში მასშტაბური შემცირებები განახორციელა, რამაც 1,500-ზე მეტ თანამშრომელზე იმოქმედა. ვრცელდება ინფორმაცია, რომ კომპანია დათხოვნების კიდევ ერთ, უფრო დიდ ტალღას განიხილავს.
მიუხედავად იმისა, რომ Meta გააგრძელებს Horizon Worlds-ის მხარდაჭერას Quest-ისთვის, კომპანია პრიორიტეტს მაინც მობაილ გამოცდილებას ანიჭებს. "მობაილზე გაცილებით დიდი აუდიტორიაა," აღნიშნა ბოსვორთმა. "გუნდს ყველაფრის ორჯერ აშენება უწევს – მობილურისთვის და VR-ისთვის. სიჩქარის გაზრდის მარტივი გზაა, რომ მათ მხოლოდ მობაილისთვის შექმნან პროდუქტი."
მობაილ ანალიტიკის კომპანია Appfigures-ის ცნობით, Horizon Worlds-ის მობილურ აპლიკაციას iOS-სა და Google Play-ზე მსოფლიო მასშტაბით 45 მილიონი ჩამოტვირთვა აქვს. თუმცა, მომხმარებლებმა აპლიკაციაში ჯამში მხოლოდ 1.1 მილიონი დოლარი დახარჯეს, რაც Meta-ს მიერ მეტავერსში განხორციელებულ ინვესტიციებთან შედარებით მიზერული თანხაა. ინვესტიციის გასამართლებლად კომპანიას გაცილებით მეტი ფინანსური უკუგება დასჭირდება.
წყარო: techcrunch.com
