სამხრეთკორეული სათამაშო კომპანია Krafton, რომელიც ცნობილია ისეთი ჰიტებით, როგორიცაა PUBG და Battlegrounds Mobile India (BGMI), ინდოეთში მომდევნო სამი-ოთხი წლის განმავლობაში დამატებით 250 მილიონი დოლარის ინვესტირებას გეგმავს. კომპანია მიზნად ისახავს გასცდეს მხოლოდ გეიმინგის სფეროს და აქტიურად ჩაერთოს AI-ის, რობოტიკისა და deep tech-ის მიმართულებებით.
ამ ახალი ვალდებულებით, Krafton-ის მიერ ინდოეთში დაგეგმილი ინვესტიციების საერთო მოცულობა 500 მილიონ დოლარს აჭარბებს. ეს თანხა არ მოიცავს იმ 670 მილიონიან ფონდს, რომელიც კომპანიამ Naver-თან და Mirae Asset-თან ერთად 2025 წლის დეკემბერში დააანონსა. ინდოეთი Krafton-ისთვის სტრატეგიულად მნიშვნელოვანი ბაზარია, სადაც მილიარდზე მეტი ინტერნეტმომხმარებელი და 700 მილიონზე მეტი სმარტფონის მფლობელია.
მიუხედავად იმისა, რომ კომპანიის საქმიანობა ინდოეთში მარტივი არ ყოფილა — მათ შორის მთავრობის მიერ PUBG Mobile-ის აკრძალვისა და შემდგომი რეგულაციების გამო — Krafton-მა შეძლო ადაპტირება და BGMI-ის წარმატებით დანერგვა. დღეისთვის კომპანიამ ინდოეთში უკვე 18-მდე სტარტაპში განახორციელა ინვესტიცია, მათ შორის ისეთ პლატფორმებში, როგორიცაა Nodwin Gaming, Loco და Kuku FM.
Krafton-ის თავმჯდომარემ, ჩანგ ბიუნგ-გიუმ, ინდოეთის პრემიერ-მინისტრ ნარენდრა მოდისთან შეხვედრისას განიხილა ორ ქვეყანას შორის თანამშრომლობის გაღრმავების პერსპექტივები ტექნოლოგიურ და სათამაშო სექტორებში. გარდა ფინანსური ინვესტიციებისა, კომპანია აძლიერებს ადგილობრივ ოპერაციებს, მათ შორის Nautilus Mobile-ის შეძენითა და KIGI Academy-ის დაფუძნებით, რომელიც მიზნად ისახავს ინდოეთში გეიმინგისა და ციფრული შემოქმედების დარგში კადრების მომზადებას.
წყარო: techcrunch.com
