ინდოელი მილიარდერის, მუკეშ ამბანის Reliance Industries-ის ციფრული ფრთა, Jio Platforms, 3.2 მილიარდი დოლარის მოზიდვას გეგმავს. ეს IPO ინდოეთის საფონდო ბირჟის ისტორიაში ყველაზე მასშტაბური იქნება და შეამოწმებს ინვესტორების ნდობას კომპანიის მიმართ, რომელმაც 2020 წელს ისეთი გიგანტებისგან, როგორებიც არიან Google და Meta, 20 მილიარდ დოლარზე მეტი მოიზიდა.
Reliance Industries-ის განცხადებით, აქციების ფასი 11.19-დან 11.76 დოლარამდე მერყეობს. განაცხადების მიღება 21 ოქტომბერს დაიწყება და 23 ოქტომბერს დასრულდება. შეთავაზების ზედა ზღვარით, Jio-ს საბაზრო კაპიტალიზაცია დაახლოებით 108.3 მილიარდ დოლარს მიაღწევს.
2016 წელს დაარსების შემდეგ, Jio ინდოეთის უმსხვილეს სატელეკომუნიკაციო ოპერატორად იქცა და 524 მილიონზე მეტი აბონენტი ჰყავს. კომპანია გასცდა მხოლოდ სატელეკომუნიკაციო სერვისებს და აქტიურად ოპერირებს ბროდბენდის, ქლაუდ სერვისებისა და სხვა ციფრული ბიზნესების მიმართულებით.
IPO-ს ფარგლებში მოზიდული თანხის ძირითადი ნაწილი, დაახლოებით 2.9 მილიარდი დოლარი, Reliance Jio Infocomm-ის ვალების დაფარვას მოხმარდება, ხოლო დარჩენილი ნაწილი კორპორატიული მიზნებისთვის იქნება გამოყენებული. მიუხედავად ილონ მასკის კრიტიკისა და Starlink-თან დაკავშირებული დაძაბულობისა, Jio-ს ფინანსური მაჩვენებლები მზარდია: ივნისის კვარტალში კომპანიის შემოსავალი 12%-ით, ხოლო წმინდა მოგება 9%-ით გაიზარდა.
წყარო: techcrunch.com
