Google DeepMind-ის მკვლევრებმა აგენტური AI-ის გამოყენებით მათემატიკურად დაამტკიცეს, ანუ ფორმალურად ვერიფიკაცია გაუკეთეს Signal-ის პროტოკოლის ძირითად კრიპტოგრაფიულ გარანტიებს. ეს მიღწევა მნიშვნელოვანია როგორც კრიპტოგრაფიის, ისე ხელოვნური ინტელექტის განვითარებისთვის.
ოთხკვირიანი პროექტის ფარგლებში, მკვლევრებმა გამოიყენეს ახალი AI ჩარჩო, სახელწოდებით AlphaProof Code. ეს მეთოდი ადასტურებს იმ კრიპტოგრაფიის სანდოობას, რომელიც იცავს კომუნიკაციებს ისეთ პლატფორმებზე, როგორიცაა Signal, Google Messages და WhatsApp. მიუხედავად იმისა, რომ ფორმალური ვერიფიკაცია პროგრამული უზრუნველყოფის უსაფრთხოების სფეროში ერთგვარ ოქროს სტანდარტად ითვლება, მისი მასშტაბურობა და პრაქტიკული გამოყენება ჯერ კიდევ კითხვის ნიშნის ქვეშ დგას.
DeepMind-ის ანალიზმა Signal-ის პროტოკოლის შესწავლილ ნაწილებში ახალი დაუცველობები არ აღმოაჩინა. თუმცა, როდესაც მკვლევრებმა AlphaProof Code გამოიყენეს Signal-ის ძველ ვერსიებზე, სადაც ცნობილი ხარვეზები არსებობდა, სისტემამ ისინი სწორად იდენტიფიცირა. Signal-ის ტექნიკური დირექტორის, Ehren Kret-ის განცხადებით, ეს მიდგომა საშუალებას იძლევა მნიშვნელოვნად გაფართოვდეს ვერიფიკაციის პროცესი, რაც განსაკუთრებით მნიშვნელოვანია AI-ზე დაფუძნებული საფრთხეების ზრდის ფონზე.
Google Cloud-ის მთავარი მეცნიერის, Pushmeet Kohli-ს თქმით, ასეთი ტექნოლოგია პოტენციურად დაეხმარება ბანკებსა და სხვა კრიტიკულ სექტორებს, დაამტკიცონ თავიანთი პროგრამული უზრუნველყოფის უსაფრთხოება. მიუხედავად ამისა, გაურკვეველია, რამდენად იქნება ეს პროცესი კომერციულად ხელმისაწვდომი და მასშტაბური. მკვლევრები ხაზს უსვამენ, რომ წარმატების გასაღები ადამიანისა და AI-ის თანამშრომლობის პროცესშია, სადაც AI აგენტები მუშაობენ, თუმცა გადამწყვეტ ეტაპებზე ადამიანის ზედამხედველობა კვლავ აუცილებელია.
წყარო: wired.com
