FBI-მ ჰანტსვილის კამპუსში (ალაბამა) 22 000 კვადრატული ფუტის ფართობის მქონე რეპლიკა-ქალაქი შექმნა. პროექტის მიზანი სამართალდამცავებისთვის უსაფრთხო გარემოში პრაქტიკული გამოცდილების მიცემაა, რათა მათ რეალურ სამყაროში არსებული კიბერშეტევების გამოძიება შეძლონ.
FBI-ს 2025 წლის ანგარიშის მიხედვით, აშშ-ში კიბერდანაშაულის შედეგად მიყენებულმა ზარალმა რეკორდულ 20,9 მილიარდ დოლარს მიაღწია, რაც წინა წელთან შედარებით 26%-იანი ზრდაა. ამ ფონზე, Kinetic Cyber Range-ის სახელით ცნობილი ობიექტი კრიტიკული მნიშვნელობისაა.
თებერვალში გახსნილი „ქალაქი“ მოიცავს საცხოვრებელ სახლებს, სასტუმროს, ბენზინგასამართ სადგურს, სასამართლოს, საავადმყოფოსა და ენერგოკომპანიას. თითოეული ობიექტი აღჭურვილია რეალური მოწყობილობებითა და სისტემებით, რაც გამომძიებლებს საშუალებას აძლევს, იმუშაონ ისეთ გარემოში, რომელიც მაქსიმალურად უახლოვდება რეალობას. ობიექტზე ასევე განთავსებულია მონაცემთა ცენტრი 200-ზე მეტი ფიზიკური სერვერით.
სიმულაციური გარემო გამომძიებლებს ეხმარება ისწავლონ რთული გადაწყვეტილებების მიღება კრიზისულ სიტუაციებში, მაგალითად, როდესაც საავადმყოფოს სისტემები გამოდის მწყობრიდან. გარდა ამისა, ობიექტი გამოიყენება ციფრული ფორენზიკის (digital forensics) ტრენინგებისთვის, რაც მოიცავს დაშიფრული მოწყობილობების დაცვის მექანიზმების გარღვევას და მონაცემთა მოპოვებას.
წყარო: techcrunch.com
