DoorDash-მა ხუთშაბათს განაცხადა, რომ უშვებს ახალ, დამოუკიდებელ აპლიკაციას სახელწოდებით Tasks. ეს აპლიკაცია საშუალებას მისცემს კომპანიას, გადაუხადოს კურიერებს AI და რობოტული სისტემების გაუმჯობესებაზე მიმართული დავალებების შესრულებაში. კურიერებს შეეძლებათ გამოიმუშაონ ფული ყოველდღიური ამოცანების გადაღებით ან უცხო ენაზე საუბრის ჩაწერით.
"ეს მონაცემები ეხმარება AI და რობოტულ სისტემებს ფიზიკური სამყაროს აღქმაში," აღნიშნულია DoorDash-ის ბლოგპოსტში. "ანაზღაურება წინასწარ არის ცნობილი და დამოკიდებულია აქტივობის სირთულესა და ძალისხმევაზე."
Bloomberg-ის ცნობით, კურიერების მიერ გაგზავნილი ორიგინალური აუდიო და ვიდეო მასალები გამოყენებული იქნება როგორც კომპანიის შიდა AI მოდელების, ასევე საცალო ვაჭრობის, დაზღვევის, მასპინძლობისა და ტექნოლოგიური სექტორების პარტნიორების მიერ შემუშავებული სისტემების შესაფასებლად.
დავალების ერთ-ერთი მაგალითია კურიერისთვის სხეულის კამერით სულ მცირე ხუთი თეფშის რეცხვის პროცესის გადაღება, სადაც თითოეული სუფთა თეფში კადრში რამდენიმე წამის განმავლობაში უნდა ჩანდეს.
DoorDash არ არის ერთადერთი კომპანია, რომელიც მიწოდების ქსელს AI მოდელების გასაწვრთნელად იყენებს. გასული წლის ბოლოს Uber-მაც დაანონსა მსგავსი ინიციატივა, სადაც მძღოლებს მცირე დავალებების შესრულებით, მაგალითად, ფოტოების ატვირთვით, დამატებითი შემოსავლის მიღება შეუძლიათ.
დამოუკიდებელი Tasks აპლიკაციის გარდა, ციფრული დავალებები ძირითად Dasher აპლიკაციაშიც გამოჩნდება. მაგალითად: რესტორნებისთვის მენიუს კერძების რეალური ფოტოების გადაღება ან სასტუმროს შესასვლელის დაფიქსირება, რათა სხვა კურიერებმა ადგილმდებარეობა მარტივად იპოვონ. დავალებების სიაში ასევე არის Waymo-სთან პარტნიორობა, სადაც კურიერებს თვითმართვადი მანქანების კარების დახურვაში უხდიან ფულს.
"Tasks-ის მიზანია დაეხმაროს ბიზნესებს უკეთ გაიგონ რა ხდება ადგილებზე და მოიპოვონ ახალი მონაცემები, ამავდროულად კი Dashers-ებს დამატებითი შემოსავლის მოქნილი გზა შესთავაზოს," განაცხადა Ethan Beatty-მ, DoorDash Tasks-ის გენერალურმა მენეჯერმა. "აშშ-ში 8 მილიონზე მეტი კურიერია, რომელთაც ნებისმიერ წერტილში მიწვდომა და მოქნილი მუშაობა სურთ. ეს ფიზიკური სამყაროს გაციფრულების უდიდესი შესაძლებლობაა."
Tasks ხელმისაწვდომია აშშ-ის შერჩეულ რეგიონებში, კალიფორნიის, ნიუ-იორკის, სიეტლისა და კოლორადოს გარდა. DoorDash სამომავლოდ დავალებების ტიპებისა და ქვეყნების არეალის გაფართოებას გეგმავს.
წყარო: techcrunch.com
