მონაცემთა ცენტრების დეველოპერმა კომპანიამ Crusoe-მ განაცხადა, რომ Series F რაუნდში 3.9 მილიარდი დოლარი მოიზიდა, რამაც მისი საბაზრო ღირებულება 30.9 მილიარდ დოლარამდე გაზარდა. საინვესტიციო რაუნდს სათავეში ჩაუდგნენ Atreides Management, Mubadala Capital და Valor Equity Partners. ინვესტორთა შორის ასევე არიან Founders Fund, GIC, Nvidia, Qatar Investment Authority (QIA), Radical Ventures და TPG.
კომპანიამ ასევე დანიშნა სამი ახალი წევრი დირექტორთა საბჭოში, მათ შორის Cloudflare-ის ფინანსური დირექტორი თომას ზაიფერტი და Redwood Materials-ის დამფუძნებელი და CEO ჯეიბი სტრაუბელი. მოზიდული კაპიტალი მოხმარდება არსებული მონაცემთა ცენტრების პროექტების დაფინანსებას, მათ შორის ტეხასში მდებარე ობიექტს, რომელსაც OpenAI იყენებს, ასევე მცირე ზომის, მოდულური „AI ქარხნების“ მშენებლობას.
Crusoe-ს მოდულური მონაცემთა ცენტრები, სახელწოდებით Spark, კომპანიის საკუთარ საწარმოებში იქმნება, რაც საშუალებას იძლევა, გამოთვლითი სიმძლავრეები სწრაფად და მასშტაბური სამშენებლო სამუშაოების გარეშე განთავსდეს. ეს მიდგომა კომპანიას ეხმარება, თავი აარიდოს ადგილობრივი თემების პროტესტს, რაც ხშირად ახლავს თან მსხვილი მონაცემთა ცენტრების მშენებლობას.
Crusoe-ს თანადამფუძნებლისა და CEO-ს, ჩეიზ ლოხმილერის თქმით, კომპანიის მიზანია ინფრასტრუქტურის სრული კონტროლი „ელექტრონებიდან ტოკენებამდე“. ბიზნესმოდელი ეფუძნება მონაცემთა ცენტრების იჯარას, GPU-ების გაქირავებას და AI მოდელების ინფერენსისთვის საჭირო გამოთვლითი სიმძლავრეების მიწოდებას. კომპანიამ ცოტა ხნის წინ 13 მილიარდი დოლარის ღირებულების ხუთწლიანი კონტრაქტი გააფორმა სავაჭრო ფირმა Jane Street-თან.
2018 წელს დაარსებული Crusoe თავდაპირველად კრიპტომაინინგით იყო დაკავებული, თუმცა მოგვიანებით სრულად გადაერთო AI ინფრასტრუქტურაზე. კომპანიის კლიენტებს შორის არიან Meta, Microsoft და Oracle. მედიაში გავრცელებული ინფორმაციით, Crusoe უკვე განიხილავს IPO-ს შესაძლებლობას უახლოეს მომავალში.
წყარო: techcrunch.com
