Automattic-ის დამფუძნებელი და CEO, Matt Mullenweg-ი, რომელიც ყველაზე მეტად WordPress.com-ის მშობელი კომპანიის ხელმძღვანელობითაა ცნობილი, დირექტორთა საბჭოს გადაწყვეტილებით იძულებით შვებულებაში გაუშვეს. ინფორმაციას TechCrunch-ი ავრცელებს.
Mullenweg-მა კომპანიის შიდა Slack-არხში განაცხადა, რომ ფინანსურმა დირექტორმა (CFO) Mark Davies-მა საბჭოს წევრებთან ერთად მის ზურგს უკან შეთქმულება მოაწყო და კენჭისყრით დროებითი შვებულების რეჟიმში გადაიყვანა. თავად Mullenweg-მა ამ გადაწყვეტილების წინააღმდეგ მისცა ხმა. დროებით CEO-დ Mark Davies-ი დაინიშნა.
Automattic-მა ოფიციალურად დაადასტურა, რომ Mullenweg-ი შვებულებაშია და კომპანიას დროებით Davies-ი უხელმძღვანელებს. აღსანიშნავია, რომ WordPress.org-ის პროექტის ხელმძღვანელობამ განაცხადა, რომ ეს ცვლილება ღია კოდის პროექტზე გავლენას არ მოახდენს და Mullenweg-ი კვლავ რჩება WordPress-ის ლიდერად.
კომპანიის გარშემო ბოლო პერიოდში არაერთი დაძაბულობა და სასამართლო დავა ფიქსირდებოდა, მათ შორის WP Engine-თან მიმდინარე კონფლიქტი, სადაც Mullenweg-ი კომპანიას WordPress-ის ბრენდის არასწორ გამოყენებაში ადანაშაულებდა. გარდა ამისა, 2024 წელს Mullenweg-მა თანამშრომლებს ღიად მოუწოდა კომპანიის დატოვებისკენ, თუ ისინი მის ხედვებს არ ეთანხმებოდნენ, რასაც 159 ადამიანის წასვლა მოჰყვა. 2025 წლის აპრილში კი კომპანიამ პერსონალის 16% შეამცირა.
ჯერჯერობით უცნობია, თუ რა გახდა საბჭოს ამ რადიკალური ნაბიჯის კონკრეტული მიზეზი, თუმცა კომპანიის შიგნით არსებული არასტაბილური გარემო და Mullenweg-ის საკამათო მმართველობითი სტილი, სავარაუდოდ, გადაწყვეტილების მიღების მთავარი ფაქტორი იყო.
წყარო: techcrunch.com
