Arm-ის აღმასრულებელი დირექტორი, Rene Haas, უმნიშვნელოვანესი გადაწყვეტილების შესახებ აცხადებს: კომპანია, რომელიც წლების განმავლობაში თავის არქიტექტურას სხვა მწარმოებლებზე ყიდდა, ახლა საკუთარ CPU-ს უშვებს. ეს უზარმაზარი ნაბიჯია კომპანიისთვის, რომლის ტექნოლოგიაზეც Apple, Nvidia, Amazon და Qualcomm არიან დამოკიდებულნი.
IP კომპანიიდან - გამოთვლით პლატფორმამდე
Haas-ის თქმით, Softbank-ის მხარდაჭერით (რომელიც Arm-ის 90%-ს ფლობს), კომპანია უბრალო IP მიმწოდებლიდან გლობალურ გამოთვლით პლატფორმად გარდაიქმნა. „როდესაც პლატფორმა ხარ, ეკოსისტემისთვის სასარგებლოა, როცა ფიზიკურ პროდუქტს ქმნი. მაგალითად, Microsoft-ის Surface ან Google-ის Pixel ხელს უწყობს შესაბამისი ეკოსისტემების განვითარებას,“ აღნიშნავს ის.
Arm AGI CPU და სამიზნე ბაზარი
ახალ ჩიპს Arm AGI CPU ეწოდება და მონაცემთა ცენტრებისთვისაა (Data centers) შექმნილი. მისი მთავარი უპირატესობა ენერგოეფექტურობა და ე.წ. Agentic AI-ის ეფექტური მართვაა. პირველი მომხმარებლები Meta, SK Hynix, Cisco და SAP იქნებიან. ჩიპის წარმოებას TSMC უზრუნველყოფს.
კონკურენცია და გამოწვევები
კითხვაზე, გააღიზიანებს თუ არა საკუთარი პროცესორის გამოშვება ისეთ პარტნიორს, როგორიც Nvidia-ა, Haas პასუხობს, რომ ახალი ჩიპი Arm-ის ეკოსისტემას აძლიერებს, რაც საბოლოოდ ყველასთვის მომგებიანია. თუმცა, ის აღიარებს: „ეს უფრო მეტად Intel-სა და AMD-ს გააღიზიანებს, რადგან ჩვენ მათ ბაზრის წილს ვართმევთ.“
ახლა Arm-ს მოუწევს ისეთი საკითხების მართვა, როგორიცაა მიწოდების ჯაჭვი, მოგების მარჟა და წარმოების მოცულობა - რაც ტრადიციული IP ბიზნესისგან რადიკალურად განსხვავდება. ამ მიზნით, კომპანიამ 2,000-მდე ინჟინერი დაიმატა.
მიუხედავად გეოპოლიტიკური და მაკროეკონომიკური გამოწვევებისა, Haas ინარჩუნებს თავდაჯერებულობას: „არასდროს არის რაღაცის დასაწყებად იდეალური დრო. უბრალოდ, უნდა ადგე და გააკეთო.“
წყარო: wired.com
