ჰუმანოიდური რობოტების ირგვლივ ატეხილი აჟიოტაჟი ახალი არ არის, თუმცა ამჯერად საქმე მხოლოდ მარკეტინგულ ხმაურს არ ეხება. Tesla-ს Optimus-ისა და Boston Dynamics-ის Atlas-ის პროგრესმა დაადასტურა, რომ ხელოვნური ინტელექტის (AI) განვითარებამ, რომელიც დიდ ენობრივ მოდელებს ეფუძნება, შესაძლოა რობოტებს ნებისმიერი კომპლექსური დავალების შესწავლის უნარი მისცეს.
ამ ტენდენციამ ჩინური ავტომწარმოებლები გაააქტიურა. Xpeng-ის რობოტიკის განყოფილებამ ცოტა ხნის წინ 900 მილიონ დოლარზე მეტი მოიზიდა, რითაც კომპანიის შეფასებამ 6.3 მილიარდ დოლარს გადააჭარბა. ეს ჩინეთის „ემბოდიმენტ AI“ (Embodied AI) ინდუსტრიაში ყველაზე დიდი კერძო ინვესტიციაა. პარალელურად, Chery Automobile-ის AiMOGA IPO-სთვის ემზადება, ხოლო BYD-მა საკუთარი ჰუმანოიდი რობოტი, Xiao Di წარადგინა. მსგავს პროექტებზე მუშაობენ Changan, GAC, Li Auto და SAIC.
ექსპერტების აზრით, Xpeng-ის დამფუძნებელი ჰე სიაოპენგი ავტომობილების წარმოებაში მოსალოდნელ დაბალ მარჟას რობოტიკის სექტორში არსებული მაღალი პოტენციალით ანაცვლებს. ჩინურ კომპანიებს აქვთ უზარმაზარი საწარმოო უპირატესობა, თუმცა მთავარი გამოწვევა Tesla-სთვის AI-ის მიმართულებით კონკურენციის გაწევაა.
ამავდროულად, Hyundai-ს მფლობელობაში მყოფი Boston Dynamics გეგმავს, რომ Atlas-ის ტიპის რობოტები საკუთარ ქარხნებში 2028 წლისთვის სრულად დანერგოს. Google-ის DeepMind-თან პარტნიორობით, კორეული გიგანტი უკვე ხსნის სპეციალურ ცენტრს, სადაც რობოტები სამრეწველო მოძრაობებსა და ლოჯისტიკურ ოპერაციებს შეისწავლიან. ბაზარზე ასევე აქტიურობენ ისეთი მოთამაშეები, როგორებიცაა Mobileye და Rivian, რაც ადასტურებს, რომ ავტოინდუსტრია რობოტიკის ეპოქაში გადადის.
წყარო: techcrunch.com
