აშშ-ში ინფლუენსერები ფარული დაფინანსების (dark money) ორგანიზაციებისგან სოლიდურ თანხებს იღებენ, რათა ამერიკული ხელოვნური ინტელექტის (AI) ინდუსტრია პოზიტიურად, ხოლო ჩინეთის ტექნოლოგიური წინსვლა საფრთხედ წარმოაჩინონ. კამპანიის უკან დგას ორგანიზაცია Build American AI, რომელიც დაკავშირებულია 100 მილიონი დოლარის ბიუჯეტის მქონე Leading the Future PAC-თან. მას მხარს უჭერენ ტექნოლოგიური ლიდერები ისეთი კომპანიებიდან, როგორებიცაა OpenAI და Palantir.
სოციალურ მედიაში მიმდინარე გავლენის კამპანია ორ ფაზად იყოფა. პირველ ეტაპზე lifestyle ინფლუენსერები აქტიურად უწევდნენ პოპულარიზაციას აშშ-ის AI ინდუსტრიასა და ინოვაციებს. მეორე ფაზა კი სრულად ჩინეთზეა ფოკუსირებული. მარკეტინგული სააგენტოები TikTok-ის ერთ ვიდეოში კრეტორებს $5,000-მდე სთავაზობენ, რათა ჩინეთის AI განვითარება ამერიკელთა უსაფრთხოებისა და სამუშაო ადგილებისთვის სერიოზულ რისკად წარმოაჩინონ.
სააგენტოების წარმომადგენელთა განცხადებით, მიზანი საჯარო დისკუსიის მიმართულების შეცვლაა. "მათ სურთ, ხაზი გაესვას ჩინეთისა და ამერიკის დაპირისპირებას და იმას, თუ რატომ არის ჩინეთის დამარცხება უმნიშვნელოვანესი," აღნიშნავს კამპანიაში ჩართული ერთ-ერთი სააგენტოს, SM4-ის თანამშრომელი.
Leading the Future-ის მხარდამჭერებს შორის არიან OpenAI-ის პრეზიდენტი გრეგ ბროკმანი, Palantir-ის თანადამფუძნებელი ჯო ლონსდეილი, ვენჩურული კაპიტალის ფირმა Andreessen Horowitz და AI კომპანია Perplexity. აღსანიშნავია, რომ თავად OpenAI და Palantir უარყოფენ ამ ჯგუფებთან კორპორატიულ კავშირს ან პირდაპირ დაფინანსებას.
საინფორმაციო ომები და ეთიკა
ტექნოლოგიური კომპანიები ცდილობენ, მოახლოებული არჩევნების ფონზე AI პოლიტიკა ინდუსტრიის სასარგებლოდ წარმართონ. კვლევების თანახმად, აშშ-ის მოსახლეობის დიდი ნაწილი ახალ ამბებს სოციალური მედიიდან და ინფლუენსერებისგან იღებს. თუმცა, ინფლუენსერები ჟურნალისტური ეთიკის სტანდარტებით არ ხელმძღვანელობენ და ხშირად არ ასაჯაროებენ შემკვეთის ვინაობას.
ექსპერტების შეფასებით, მსგავსი ტენდენცია დემოკრატიისთვის უკიდურესად დამაზიანებელია. ნიუ-იორკის ქალაქის უნივერსიტეტის პროფესორის, ჯეიმი კოენის თქმით: "მომხმარებლებმა არ იციან, როდის არის ინფორმაცია დაფინანსებული. ინფლუენსერები ფარულ ფულს იღებენ AI ინდუსტრიისგან და კონკრეტული კომპანიების მესიჯებს ავრცელებენ. ეს პირდაპირი პროპაგანდაა."
ეს კამპანია ეხმიანება ისეთი კომპანიების ნარატივს, როგორიცაა Palantir და OpenAI, რომლებიც ჩინეთის ტექნოლოგიურ წინსვლას აშშ-ის AI ინვესტიციების გაზრდისა და შიდა რეგულაციების შესუსტების არგუმენტად იყენებენ. მიუხედავად ამისა, კრიტიკოსები აღნიშნავენ, რომ საზოგადოებრივი აზრის ფარული მანიპულაცია დემოკრატიულ იდეალებთან შეუთავსებელია.
წყარო: wired.com
