Google-მა Gemini AI-ის აპლიკაციები მნიშვნელოვნად განაახლა, რაც მათ ფუნქციონალს კიდევ უფრო აძლიერებს. თუმცა, ტექნოლოგიურ გაუმჯობესებასთან ერთად, კომპანიამ შეცვალა AI-ის მოხმარების წესები და ლიმიტები, რომლებიც ვრცელდება როგორც უფასო, ისე ფასიან (Plus, Pro, Ultra) პაკეტებზე.
როგორ იცვლება AI-ის მოხმარების პრინციპი
Google-მა უარი თქვა მოთხოვნების რაოდენობაზე დაფუძნებულ შეზღუდვებზე და გადავიდა გამოთვლითი სიმძლავრის (computing power) გაზომვაზე. ეს ნიშნავს, რომ ლიმიტი დამოკიდებულია არა იმაზე, თუ რამდენჯერ მიმართეთ AI-ს, არამედ იმაზე, თუ რამდენად რთულია თქვენი დავალება. მაგალითად, ვიდეოს გენერირება გაცილებით მეტ რესურსს მოითხოვს, ვიდრე ტექსტური შეკითხვა.
ლიმიტებზე გავლენას ახდენს სამი ძირითადი ფაქტორი: თქვენი სააბონენტო გეგმა, მოთხოვნის სირთულე და არჩეული მოდელი (მაგალითად, Flash ან Pro). გარდა ამისა, თითოეულ მოდელს აქვს „აზროვნების“ განსხვავებული დონეები (Standard, Extended, Deep Think), რაც ასევე ცვლის რესურსების მოხმარებას.
საგარიფო გეგმები და ლიმიტები
Google-ის სააბონენტო გეგმები განსაზღვრავს თქვენს ხელმისაწვდომ რესურსს:
- უფასო გეგმა: სტანდარტული ლიმიტები.
- AI Plus: სტანდარტულზე 2-ჯერ მეტი ლიმიტი.
- AI Pro: სტანდარტულზე 4-ჯერ მეტი ლიმიტი.
- AI Ultra: 5-დან 20-ჯერ მეტი ლიმიტი, გეგმის მიხედვით.
მნიშვნელოვანი განსხვავებაა კონტექსტური ფანჯრის (context window) ზომაშიც: უფასო მომხმარებლებისთვის ის 32K ტოკენია, ხოლო Pro და Ultra მომხმარებლებისთვის — 1 მილიონი ტოკენი, რაც საშუალებას იძლევა, ერთ სესიაში გაცილებით მეტი ინფორმაცია დაამუშაოთ.
როგორ შევამოწმოთ ლიმიტები
თქვენი მიმდინარე სტატუსის სანახავად, Gemini-ის ვებ-აპლიკაციაში ან მობილურ აპლიკაციაში გადადით Settings (პარამეტრები) > Usage limits (მოხმარების ლიმიტები). აქ ნახავთ ორ ინდიკატორს: ხუთსაათიან და ყოველკვირეულ ლიმიტებს. თუ ლიმიტს ამოწურავთ, სისტემა ავტომატურად გადაგიყვანთ უფრო მარტივ მოდელზე ან მოგთხოვთ ლოდინს განახლებამდე.
წყარო: wired.com
