კიბერუსაფრთხოების არსებული გამოწვევების ფონზე, agentic AI-ის განვითარება ახალ რისკებს აჩენს. სულ უფრო მეტი ქმედება სრულდება ავტომატიზებული აგენტების მიერ მომხმარებლების სახელით.
ამ პრობლემის გადასაჭრელად FIDO Alliance-მა, Google-თან და Mastercard-თან თანამშრომლობით, დააანონსა სამუშაო ჯგუფების შექმნა. მათი მიზანია შეიმუშაონ ინდუსტრიული სტანდარტები AI აგენტების მიერ განხორციელებული გადახდების დასაცავად.
ახალი სტანდარტები მოიცავს კრიპტოგრაფიულ ინსტრუმენტებსა და კონფიდენციალურობის ჩარჩოებს. FIDO Alliance-ის CEO-ს, ენდრიუ შიკიარის განცხადებით, ტრადიციული უსაფრთხოების მოდელები არ არის მორგებული ახალ პარადიგმაზე, სადაც ქმედებებს AI ასრულებს ადამიანის მაგივრად.
ინდუსტრიული სტანდარტების შექმნა, როგორც წესი, წლებს მოითხოვს, თუმცა AI-ის სწრაფი განვითარება პროცესის დაჩქარებას მოითხოვს. ამისთვის Google წარმოადგენს Agent Payments Protocol (AP2) სისტემას, რომელიც კრიპტოგრაფიულად ადასტურებს მომხმარებლის განზრახვას, ხოლო Mastercard ნერგავს Verifiable Intent ჩარჩოს.
Google-ის გადახდების მიმართულების ვიცე-პრეზიდენტის, სტავან პარიხის თქმით, მთავარი ამოცანაა ტრანზაქციის უსაფრთხოდ დადასტურება ისე, რომ დაცული იყოს პერსონალური მონაცემები. ეკოსისტემის თითოეული მონაწილე დაინახავს მხოლოდ იმ ინფორმაციას, რაც უშუალოდ მას სჭირდება.
Mastercard-ის ციფრული მიმართულების ხელმძღვანელი, პაბლო ფურეზი ხაზს უსვამს დროულობის მნიშვნელობას: „ტექნოლოგია სწრაფად ვითარდება. მომხმარებლებს უბრალოდ უნდათ იცოდნენ, რომ სისტემა მუშაობს და მისი ნდობა შეიძლება. ბოროტმოქმედების მიერ ამ სისტემების გამოყენების ფასი ძალიან მაღალია, ამიტომ სტანდარტები რაც შეიძლება მალე უნდა დავნერგოთ“.
წყარო: wired.com
