ერთ დროს პოპულარული ნიუსლეთერების პლატფორმა, Substack, სულ უფრო მეტ პროფესიონალ ავტორს კარგავს. ისინი ნაკლებად ცნობილ, თუმცა ბევრად მოქნილ კონკურენტ პლატფორმებზე ინაცვლებენ. გადაწყვეტილების მთავარი მიზეზი შეზღუდული კონტროლი, პლატფორმის სოციალურ ფუნქციებზე ზედმეტი ფოკუსირება და საფასო მოდელია, რომელიც შემქმნელების ბიზნესს აფერხებს.
საკომისიო vs ფიქსირებული გადასახადი
ბევრი შემქმნელი, როგორიცაა სპორტული გამოცემის, The Rose Garden Report-ის ავტორი შონ ჰაიკინი, აცხადებს, რომ Ghost-ზე გადასვლის შემდეგ მათი შემოსავალი საგრძნობლად გაიზარდა. Substack-ის 10%-იანი საკომისიოს ნაცვლად, Ghost და სხვა პლატფორმები (მაგალითად, Beehiiv) მომხმარებლებს ფიქსირებულ ყოველთვიურ გადასახადს სთავაზობენ. Extra Points-ის ავტორი მეთ ბრაუნი აღნიშნავს, რომ მისი აუდიტორიის ზომიდან გამომდინარე, Substack-ზე წლიურად 25,000 დოლარზე მეტის გადახდა მოუწევდა, მაშინ როცა Beehiiv-ზე მხოლოდ 3,000 დოლარს იხდის.
პერსონალიზაცია და ინტეგრაციები
საფასო პოლიტიკის გარდა, პლატფორმის კრიტიკის ობიექტი მისი დახურული ეკოსისტემაა. Substack-ს აქვს შეზღუდული ინტეგრაცია მესამე მხარის აპლიკაციებთან და ნაკლები პერსონალიზაციის შესაძლებლობა. ცნობილმა გამოცემამ, The Ankler-მა, Substack-ი დატოვა და Passport-ზე გადავიდა, რათა მეტი კონტროლი მოეპოვებინა პროდუქტზე, შემოსავალსა და აუდიტორიასთან ურთიერთობაზე. Beehiiv-ის დამფუძნებლის, ტაილერ დენკის თქმით, მათი მიდგომა უფრო Shopify-ს ჰგავს, ვიდრე Amazon-ს — ისინი შემქმნელებს აძლევენ ინფრასტრუქტურას, რათა ბრენდი დამოუკიდებლად განავითარონ.
მონაცემთა პორტაბელურობის პრობლემა
Substack დიდ ინვესტიციას დებს აღმოჩენისა და რეკომენდაციების ალგორითმებში, როგორიცაა ახალი Notes ფუნქცია. თუმცა, როდესაც შემქმნელი პლატფორმას ტოვებს, მას შეუძლია მხოლოდ ელფოსტის გამომწერთა (subscribers) ბაზის ექსპორტი და არა Notes-ის მიმდევრების (followers). დამატებითი გამოწვევაა iOS აპლიკაციაში გადახდებიც — Apple ტრანზაქციებზე 30%-იან საკომისიოს აწესებს და ავტორებს ამ საგადახდო ინფრასტრუქტურის თან წაღება არ შეუძლიათ.
მართალია, Substack კვლავ რჩება ბაზრის მნიშვნელოვან მოთამაშედ, თუმცა წამყვანი გამოცემების გადინება მიანიშნებს, რომ პლატფორმა, შესაძლოა, სტარტაპებისთვის უბრალოდ საწყის ეტაპად იქცეს და არა ციფრული მედიის მუდმივ სამყოფელად.
წყარო: theverge.com
