ორმა ამერიკელმა სენატორმა მონაცემთა ცენტრებისა და მათი ენერგომოხმარების წინააღმდეგ მიმდინარე აქტიურ ფრონტზე მორიგი ნაბიჯი გადადგა. სენატორებმა Josh Hawley-მ და Elizabeth Warren-მა აშშ-ის ენერგეტიკული ინფორმაციის ადმინისტრაციას (EIA) წერილი გაუგზავნეს, სადაც ითხოვენ მონაცემთა ცენტრების ენერგომოხმარების დეტალების შეგროვებას და იმის გარკვევას, თუ როგორ მოქმედებს ეს მოხმარება ენერგოსისტემაზე.
სენატორები მოუწოდებენ EIA-ს, „დააწესოს სავალდებულო წლიური ანგარიშგების მოთხოვნა მონაცემთა ცენტრებისა და სხვა მსხვილი მომხმარებლებისთვის“. მათი თქმით, ელექტროენერგიაზე მოთხოვნის ზრდის ფონზე, მსხვილი მომხმარებლების შესახებ სანდო და სტანდარტიზებული მონაცემების ნაკლებობა მნიშვნელოვან რისკებს უქმნის ქსელის ეფექტურ დაგეგმვასა და ზედამხედველობას.
ეს არ არის პირველი შემთხვევა, როდესაც პოლიტიკოსები მონაცემთა ცენტრებზე ახალი მარეგულირებელი მოთხოვნების დაწესებას ცდილობენ. სენატორმა Bernie Sanders-მა და წარმომადგენელმა Alexandria Ocasio-Cortez-მა განაცხადეს, რომ შეიტანენ კანონპროექტს, რომელიც ახალი მონაცემთა ცენტრების მშენებლობას შეაჩერებს, სანამ კონგრესი AI-ის რეგულირებაზე არ შეთანხმდება.
ბოლო წლებში მონაცემთა ცენტრების ენერგომოხმარება მკვეთრად გაიზარდა. მაგალითად, Google-ის მონაცემთა ცენტრებმა 2020-დან 2024 წლამდე მოხმარება გააორმაგეს. 2035 წლისთვის კი, დაგეგმილი ახალი ცენტრები სექტორის ენერგომოთხოვნას თითქმის გაასამმაგებს.
EIA-მ აშშ-ში ენერგომოხმარების შესახებ უამრავი ინფორმაცია შეაგროვა, თუმცა ის ძირითადად ფართო კატეგორიებზე ფოკუსირდება. Hawley და Warren ითხოვენ უფრო დეტალურ ინფორმაციას მონაცემთა ცენტრებზე, მათ შორის იმაზე, თუ რით განსხვავდება AI გამოთვლითი ამოცანებისა და ზოგადი cloud სერვისების ენერგომოხმარება.
სენატორებს კონკრეტული მოთხოვნები აქვთ, თუ როგორი უნდა იყოს ეს მონაცემები, მათ შორის საათობრივი, წლიური და პიკური ენერგოდატვირთვა და ტარიფები, რომლებსაც კომპანიები იხდიან. მათ ასევე აინტერესებთ, საჭიროებს თუ არა ახალი მსხვილი მომხმარებლები ქსელის განახლებას და როგორ ფინანსდება ეს პროცესი.
წერილში ნახსენებია EIA-ს ადმინისტრატორი Tristan Abbey, რომელმაც დეკემბერში განაცხადა, რომ სააგენტო აუცილებელ როლს შეასრულებს მონაცემთა ცენტრების ენერგომოთხოვნის შესახებ მონაცემების შეგროვებაში. სენატორებმა სააგენტოსგან პასუხი 9 აპრილამდე მოითხოვეს.
წყარო: techcrunch.com
